ولادك دخلوا المدرسة؟ تعملي إيه مع قلة النظام؟؟
admin2023-10-04T22:51:28+00:00من الحاجات البايخة اللي ممكن تحصل في اليوم إنك تتخانقي إنتي وولادك على الصبح وتقعدي تزعقي علشان ده مش لاقي شرابه، وده مش لاقي الشيت اللي حله امبارح علشان يحطه في الشنطة وده نسي يغسل سنانة وافتكر فجأة على الباب وانتو نازلين، وده نسي ساندوتشاته على السفرة، وبتبقوا بتجروا ورا بعض وانتي مش طايقة نفسك وعمالة تصوتي فيهم علشان ينجزوا.. بداية صعبة جدا لليوم..
الأصعب بقى إنك لما توصلي شغلك، تفتكري إن المدرسة كانت باعتالك علشان تروحي تحلي مشكلة بنتك الساعة 9، بس هيهات بقى، مش هتضربي المشوار ده تاني وانتي عندك شغل كتير، فتضطري تتصلي بالمدرسة وتسمعيلك كلمتين ملهمش لزمة..
ولما ترجعوا البيت تكتشفي إن بنتك نسيت الواجب في المدرسة وابنك نسي يحط هدوم التمرين في الغسالة ومعندوش حاجة يروح بيها التمرين.. وتلاقي بنتك التانية غضبانة منك وبتقولك أنا كنت جعانة طول النهار، انتي عملتيلي ساندوتشات لانشون وأنا مبحبوش، تقوليلها لأ دي مكانتش ساندوتشاتك، دي كانت بتاعة أختك وانتي أخدتيها بالغلط…
كلنا بنواجه المشاكل دي بشكل ما أو بآخر، وجربتي تقولي مرة واتنين متنسوش الحاجة، سيبتيله ورقة في شنطته علشان مينساش الهومورك، بس الورقة دي اصلا اتفعصت في وسط الكتب والساندويتشات واختفت اختفاء مريب واللي بننام فيه، بنصبح فيه ومهما علمتي وزعقتي، مفيش حاجة بتتغير..
أحلى حاجة تعمليها في المواقف دي وعن تجربة، هي التنظيم اللطيف ، اللي هو مش تقيل على القلب ومش جامد ومش محتاجة تبذلي فيه مجهود جبار.. هي الخطوات دي:
- لو خايفة إن فيه إيفنتات تفوتك في المدرسة ويجيلك اجتماع في الشغل يخليكي مش قادرة تحضري لولادك، سجلي كل حاجة على ال calendar من أول السنة، مواعيد مقابلات أولياء الأمور، مواعيد الحفلات، مواعيد الامتحانات، مواعيد البطولات، جايلك مقابلة مستعجلة في المدرسة، .. كل ده سجليه في ال calendar علشان ترتبي مواعيدك في الشغل على أد ما تقدري ميفوتكيش مواعيد ولادك المهمة..
- فيه شرابات لطيفة أوي مكتوب عليهم أيام الأسبوع، وكل يوم بنتك تسحب الشراب باليوم فمتبقيش قلقانة إنها تقعد تدور على الشراب الصبح وتنزلوا متأخر..
- جهزي الساندوتشات وحطيهم في مكان ثابت كل يوم ولكل ابن وبنت من ولادك حطي الساندوتشات في مكان ثابت لا يتغير.. يعني مثلا جنب الكاتل حاجة يوسف، يمين الميكرويف حاجة حبيبة، شمال الميكرويف حاجة محمد، بحيث الكل يبقى عارف ساندوتشاته فين، يسحبها ويمشي وميلخبطوش..
- اعملي معاه checklist .. أسهل حاجة ال visualization بمعنى إن لما حد فينا بيشوف المهام اللي وراه قدام عينه، المخ بيحطها في شكل صورة عنده وبالتالي بتبقى أسهل في التنفيذ ..
أنا فاكرة كويس وأنا صغيرة، مكانش عندي مشاكل في التنظيم لكن كنت بعلق كل حاجة ورايا قدامي على المكتب علشان منساش حاجة وكنت بستمتع جدا لما أشطب الحاجة اللي خلصت.. وده كان بيساعدني إني أحافظ على نفس الروتين طول السنة ولما اتعودت عليها مكنتش بحتاج أصلا إني أبص على ال checklist اللي أنا عاملاها..
طيب ال checklist دي هتختلف من شخص للتاني، يعني هتتناسب تناسبا عكسيا مع النظام..يعني نعملها مفصلة أكتر للأقل نظاما وأقل تفصيلا للأكثر نظاما..
حسب السن، لو بيعرف يقرأ بنكتب ، أو لو لسه صغير، بنحط صور.. بعدها حطي الجدول في شيت بلاستيك علشان يعلم عليه من بره، إذا عمل الخطوات دي أو لأ، و الورقة تفضل نضيفة.. كل اللي عليكي، إنك تحطيها في شيت بلاستيك جديد كل أسبوع..
وممكن نعمل checklist منفصلة للمدرسة علشان مينساش كتبه وكراريسه وشيتات الواجب بتاعة تاني يوم فيها:
لو فيه حاجات لاحظتي إنها بتقع منه أو بينساها بردو، اسأليه سؤالين بس اديله فرصة يجاوب على كل سؤال لوحده، تفتكر ليه بتنسى الخطوة دي؟ وأقدر أساعدك إزاي إنك متنسهاش تاني؟ واسمعي كل اللي هيقوله، ممكن تكتشفي إن عنده مشكلة في مادة معينة أو مشاعره من ناحية الحاجة اللي بينساها دي محتاج إنه يعبر عنها.. المهم إنك تساعديه إنه يحط خطة بديلة أو معدلة علشان مينساش تاني..
فايدة ال checklist إيه؟
إننا لما بنحقق أهداف ولو صغيرة جدا، المخ بيخزن المعلومة اللي ساعدتك تحقق الهدف ده، وده بيحصل علشان في كل مرة بتحقق هدف أو بتنجز شيء، الدوبامين بيتدفق وبيروح للجزء المسؤول عن المتعة والتعلم والدوافع، فبيخلينا نحس بتركيز أكبر وبيخلينا عايزين نكرر التجربة اللي خلت الدوبامين يفرز ويشعرنا بالمتعة دي..
في الصور تحت البوست هتلاقي أمثلة لجداول ال checklists ، جدول رقم 1 لتنظيم المهام داخل البيت، قبل وبعد المدرسة وقبل النوم، وجدول رقم 2 علشان مينساش كتبه وكراريسه في المدرسة.. لو انتي عارفة جدول الواجبات الأسبوعي بتاعه، اكتبيهم مسبقا، أو اكتبي كل المواد كل يوم وسيبيه هو يمر عليهم كلهم قبل ما يخرج من المدرسة.. ممكن طبعا تغيري ترتيبها..
طبعا الجداول دي أمثلة بس علشان محدش يقولي الجدول فيه أكتر من كده بكتيييييير.. عارفة والله
اتفرجي عليها علشان تطلعي بال checklist المناسب ليكي ولولادك ..
اترك تعليقاً