وقتك ضيق ومش عارفة تخلصي اللي وراكي؟

أنا خلاص مش قادرة.. أنا عايزة 24 ساعة فوق ال 24 ساعة بتاعة اليوم علشان أخلص اللي ورايا..

اليوم بيجري واللي كنتي عايزة تخلصيه من أسبوع لسه وراكي وحاسة إن عمره ما هيخلص؟ تعبانة ومرهقة طول الوقت؟ مش طايقة تسمعي صوت العيال ولا صوت لا مؤاخذة جوزك حتى؟

أنا بمر بالموضوع ده من فترة للتانية وبعد سنين من إني آجي على نفسي وأفضل مكملة في واجباتي في البيت والشغل والمشاوير والواجبات العائلية وهنا وهنا، لقيت إن صحتي بتتعب ولما بروح للدكتور يقولي ده stress  ويكتبلي على مهديء.. طيب متشكرين نورت المحكمة.. وطبعا ولا باخد مهديء ولا بعمل حاجة.. بس بقلل سرعتي شوية وبقلل الواجبات اللي عليا. وأول ما أحس نفسي كويسة، ترجع ريما لعادتها القديمة..

أنا بقى في البوست ده، لا هقولك اعملي خطة ولا حطي أولويات ولا اعملي أي حاجة.. لما تحسي إنك مش هتخلصي أي حاجة والدنيا اتكركبت عليكي وخلاص مش عارفة تعملي إيه.. اعملي زيي بعد ما اتعلمت إن الشغل مبيقفش على حد وإن مفيش حد هينفعك..

إيه اللي بعمله لما بحس إني ورايا مليون حاجة وإني مش هخلص اللي ورايا؟؟

مبعملش أي حاجة خالص..

بقفل على الشغل، مبشتغلش.. حرفيا مبعملش حاجة.. مبطبخش، مبروقش.. وبخرج.. أيون.. بخرج أتمشى، أتعشى، أي حاجة.. طيب والحاجات اللي ورايا؟ مش هتطير والله.. هي هتفضل زي ما هي.. بس أنا اللي توتري هيقل وهقدر أشتغل تاني وأنجز بعد ما أفصل شوية..

طول ما انتي ضاغطة على نفسك، صدقيني ما هتنجزي وصوتك هيعلى على العيال وأبوهم وهتدخلي نفسك في مشاكل أكتر إنتي في غنى عنها..

لكن لما تفصلي شوية وتستريحي، هيبقى عندك القدرة على التنظيم والإنجاز وكل الحاجات العظيمة دي..