هطبخ إيه بكرة؟ العيال هياكلوا إيه

هطبخ إيه بكرة؟ العيال هياكلوا إيه

سؤال بيتردد كل يوم في بيت كل أم مصرية، لكنه بيتردد في بيت كل أم بتشتغل كل دقيقة، لأن السؤال بيبقى أكثر تعقيدا:

هطبخ إيه؟ وإمتى؟ وإيه أسهل وأسرع طريقة؟ وينفع أحط الأكل ده في الفريزر ولا لأ؟

أنا لما بسيب نفسي من غير خطة وأصحى الصبح أسأل نفسي السؤال ده، أعصابي بتتعب وببقى حاسة إن فيه جبل على دماغي.. ده غير إني ببقى متكركبة واليوم بيمشي ملخبط..

لقيت إن الخطة الأسبوعية اللي ممكن أعملها للأكل بتوفر عليا مجهود وتفكير ووجع قلب كتير..

  1. علشان تبقى خطة مظبوطة ومحدش يفاجئك إن الأكل مش عاجبه ولا انتي مضطهداه، يبقى لازم أولا تخلي ولادك شركاء أساسيين في الخطة.. و ولادك كلهم، بكرر، كلهم يبقوا مشتركين في الخطة علشان توفري على نفسك زن ملوش لزمة.. ولو قولولك في نص الأسبوع إنهم نفسهم في حاجة معينة، اكتبيها في ليستة أفكار الأكل علشان تسعفك في وقت زنقة..
  2. قسمي الأكل اللي عايزة تعمليه ل 4 حاجات: خضار، لحوم، نشويات (مكرونة ورز) ومخبوزات..
  3. اعملي خطة لأسبوعين مش لواحد واعملي حسابك إن في كل أسبوع هيبقى فيه يوم للبواقي اللي فاضلة من كل يوم، ويوم تاني تطلبوا من برة أو تاكلوا جبنة وبيض وفول و كده، يعني في الأسبوعين إنتي هتطبخي لعشر أيام بس (خطة ذكية ومريحة )
  4. بعد ما تعرفي إنتي هتطبخي إيه، هتعرفي إنتي هتشتري إيه.. اكتبي قائمة السوبرماركت واحتياجاتك بالضبط من الفراخ واللحوم.. والأحسن إنك تطلبي معظم الحاجات بالتليفون علشان انتي لما بتروحي السوبرماركت عينك بتقع على حاجات مغرية وبتشتريها وبتصرفي فلوس أكتر من الميزانية المحددة..
  5. لما تطبخي، اعملي وجبتين، يعني ليومين، واحدة تاكلوها والتانية تشيليها في الفريزر علشان أيام الزنقات أو المفاجآت.. يعني اتعزمتي عند واحدة صاحبتك مثلا، متبقيش شايلة هم إنك بردو هتطبخي علشان جوزك لما يرجع يلاقي أكل.. استمتعي باليوم اللي من غير طبيخ ده وطلعي من الفريزر أكلة جديدة مأكلتوهاش من أسبوع أو اتنين.. خليكي واعية..

تخطيط المهمات الأساسية اللي عليكي هتخلي أعصابك أهدى وزعيقك يقل وعلاقتك بولادك هتتحسن..

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *