هاتي من الآخر..

لما كنت بدخل في أي حاجة جديدة عليا، دايما كنت بسأل الناس اللي سبقوني علشان أستفيد من خبراتهم، يعني أول مرة أدخل الكلية، أول مرة أشتغل لمريض، أول مرة أدخل سكشن، أول ديمو.. كنت دايما بدور على أصحاب الخبرة يفيدوني علشان أفهم الصورة ككل وبعدين أتصرف فيها بشخصيتي، لاحظت حاجة مهمة جدا على مر السنين.. إن نادرا جدا لما تلاقي حد بيديك خلاصة التجربة.. نادرا لما حد بيدي المعلومة كاملة.. مش علشان هما قاصدين يخبوا ( ولو إن فيه جزء من الناس كده فعلا)، لكن لأنهم مبيعرفوش يدوا الخلاصة أو الكبسولة ويعملوا هايلايت highlight على أهم حاجات ممكن تقابل الواحد…

ولاحظت إني لما بدخل موضوع بقدر أدي فيه صورة كاملة وتفاصيل مهمة تخلي أي حد بعدي يدخل الموضوع وهو فاهمه بشكل كبير.. أنا بحب أجيب من الآخر وبحب أدي كل الناس الزتونة علشان متلفش كتير..

على سبيل المثال، رسالة الدكتوراه بتاعتي… طبعا المفروض إن أي رسالة تبقى مكتوبة بشكل تفيد الباحث اللي ييجي بعد صاحب الرسالة، لكن اللي اكتشفته بردو، إنه مش شرط، فيه رسائل بتبقى مكتوبة كويس، لكن متقدرش تاخد منها حاجة نظرا لأنها مش منظمة كويس، أو مش مجمعة كل التفاصيل في الموضوع ده أو أيا كان السبب..

اللي عرفته بعد ما مشيت من جامعة المنصورة ب حوالي 3 سنوات، إن رسالتي مبتقعدش في القسم خالص علشان الباحثين على طول بيستعيروها… أد إيه الكلمة دي لما اتقالتلي فرحتني.. وأنا اللي كنت فاكرة إني علشان نقلت، الناس نسيتني (وده الطبيعي ومكنتش زعلانة)، بس اكتشفت فعلا إن العلم النافع بيفضل أثره وإننا منستهينش بأي حاجة احنا بنعملها ولازم نتقي ربنا فيها علشان تبقى صدقة جارية لينا.. لازم الرسالة تطلع شاملة جامعة لموضوع الرسالة…

قبل ما أبتدي أدي كورسات للأمهات، قررت إني أطبق نفس المبدأ، أنا عايزة أدي للناس العلم والتطبيق والخبرة من الآخر، مش عايزاهم يلفوا كتير ويحتاروا كتير…

لما بدأت أدي وركشوب للأمهات المشغولين، فكرت كتير إيه أكتر وجع قابلني وبيقابل أي أم مشغولة… جمعت كل حاجة.. ازاي يقدروا يبقوا مايسترو في حياتهم، إزاي يقدروا يفهموا مشاعر وتصرفات ولادهم، يفهموا نفسهم أكتر، ينجحوا في أي حاجة هما عايزين يعملوها سواء في شغلهم أو أي حاجة في حياتهم، ويقدروا يبنوا روابط تواصل قوية بينهم وبين ولادهم… و لقيت إن الأمهات بتبسط جدا لما بديهم الخلاصة، خلاصة العلم والتطبيق والخبرة، لأنهم بيبقوا تاهوا كتير، واحتاروا كتير..

ودي نصيحتي لأي حد بيدي كورسات، متخبيش حاجة، العلم النافع والصدقة الجارية أهم بكتير من إنك تكتم علم، دايما إدي للناس أكتر حاجة هما محتاجينها🥰….

وهو ده اللي بيخليني بحب أي حاجة بدخل فيها، كورس، محاضرة، أي حاجة.. إني أدي للناس الخلاصة، أجيب من الآخر…