مشاكل كتير في الشغل؟ مش عارفة تفكري في حلول؟؟

مشاكل كتير في الشغل؟ مش عارفة تفكري في حلول؟؟

لما تواجهي مشكلة في شغلك، وتبقي مخنوقة ومش قادرة تشتغلي بنفس الأداء اللي انتي متعودة عليه وضغط الشغل بيزيد ومش عارفة تاخدي أجازة…

طيب تعملي إيه؟؟ تنفجري؟ تتسبي في رفدك؟

لأ طبعا…. تكلمي واحدة صاحبتك أو أختك وتقوليلها اسمعيني بس، أنا محتاجة حد يسمعني دلوقتي… قوليلها كل اللي انتي عايزاه، احكيلها الضغط اللي انتي بتواجهيه، قوليلها مشاعرك وأحاسيسك وهي هتسمعلك كويس وتتعاطف معاكي بس من غير نصائح خالص…

طيب ليه متنصحكيش؟ مايمكن عندها فكرة كويسة تقولهالك تقدري تلاقي بيها حل للي انتي فيه؟ علشان ببساطة محدش يقدر يحط نفسه مكان حد، والحل اللي ينفعلك ممكن مينفعش غيرك وانتي أكتر حد يقدر يحل مشاكله، بس إمتى؟ لما ال prefrontal cortex بتاعك يقدر يشتغل ، لأنه وقت التوتر بيقفل تماما وانتي مبتبقيش لاقية أي حلول…

بعد اما تفضفضي وتطلعي كل مشاعرك، بتلاقي نفسك قادرة تفكري بشكل أفضل وبتلاقي حلول كتير وساعتها لو عايزة نصيحة حد ممكن تكلميه تسأليه على النصيحة بس مش وقت ما تبقي متوترة لأنك مش هتبقي عارفة حتى تقيمي إذا النصيحة دي أو الحل ده مناسب بالنسبالك ولا لأ وممكن جدا إذا نفذتيه تندمي بعد كده… مسمعتيش عن واحدة اتخرب بيتها علشان نفذت نصيحة واحدة صاحبتها متنفعهاش من غير ما تفكر؟ كتير طبعا…

الطريقة دي مضمونة وبتخليكي قادرة تواجهي المواقف بقوة نفسية أكبر من الأول، بحكمة أكتر، بضبط نفس أعلى وبالتالي النتايج بتبقى أفضل بكتير…

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *