لكل أم معندهاش وقت

بتعدي علينا فترات واحنا مشغولين جدا لدرجة إننا مبيبقاش عندنا فعلا دقيقة…

لما بناتي كانوا صغيرين ، كان بييجي عليا وقت ببقى مشغولة جدا في الكلية وسط الماجيستير والدكتوراة ومع إني كنت بتابع الواجبات والكويزات يوم بيوم، إلا إني بردو كنت بتفاجيء بامتحانات وأنا مش واخدة بالي ..

والكلام اللطيف بقى لما أسأل الأمهات التانيين هو احنا عندنا امتحان إيه بكرة، فيبقى الرد اللطيف الظريف اللي من عينة ” هو انتي مش دكتورة؟ مش المفروض تبقي عارفة كل حاجة؟ هما طبعا كانوا بيهزروا، بس أنا مكنتش ناقصة ظرف بصراحة

ضميري أنبني؟ أكيييد… وقفت عند التأنيب وجلد الذات؟ أبسولوتلي نوت…..

قلت لنفسي أنا مشغولة ودي حقيقة، والوقت ده أنا مش ناقصة توتر أكتر… ف إيه الحل اللي يكون سهل بحيث ان الامتحانات تبقى قدامي مش مجرد إني بعتمد على الذاكرة أو إني أفتكر أدخل كل شوية أشوف فيه امتحانات إيه بكرة ..

أكيد فيه حلول كتير ومهم إننا نعمل الحلول دي معاهم..

اقرئي على مهلك ومهم أوي إنك تقرئي الحلول لآخرها:

• للأمهات اللي بيحبوا التكنولوجي : سجلي الامتحانات على ال calendar بحيث إنك تشوفي كل يوم فيه امتحان إيه بكرة.. بس علشان ال calendar  ممكن تبقى مليانة مواعيد وكل يوم بيبقى فيه 5 أو 6 مواعيد متسجلين غير المواعيد العادية اللي مبتتسجلش أصلا، فبنعمل color coding  وتختاري الألوان اللي ليها معنى بالنسبالك لكل حاجة.. مثلا، مواعيد شغلك بالأزرق ، مواعيد الحاجات اللي بتحبي تعمليها زي كورسات خاصة بهواياتك أو بالشغف بتاعك باللون الموف، مواعيد ولادك بالأخضر والمواعيد اللي خايفة تنسيها زي الامتحانات بالأحمر.. فلما بتبصي على ال calendar بتعرفي المواعيد بتاعة مين من قبل ما حتى تشوفي التفاصيل..

• للأمهات اللي ملهاش أوي في التكنولوجي ومش متعودة على ال calendarممكن تختاري الطريقة دي: على ال word في ال Microsoft office  هتلاقي  templates  كتير جدا وأشكالها وألوانها تحفة، في الاختيارات بتكتبي  calendar بيطلعلك أشكال كتير، اختاري شكل منهم والعبي بقى في الألوان والصور الموجودة واطبعيها وعلقيها قدامك واكتبي فيها كل الامتحانات والكويزات، شهر ب شهر.. الصورة اللي أنا حاطاها دي من ال templates  بعد ما غيرت ألوانها..

• فيه templates كتير على النت وجاهزة للاستخدام الفوري وبيبقى مكتوب اسم الشهر ودي بتلاقيها تحت عنوان free printable calendars for kids ودي بتبقى فيها رسمة بسيطة جدا والجدول الشهري فاضي، اطبعيه وامليه..

• هتسألوني دلوقتي ليه مقولتش حاجات مفيهاش كمبيوتر ولا انترنت، هو مفيش حاجة كده سهلة وسريعة نقدر نعملها؟؟ أكيد فيه بس احنا في العصر ده، عصرهم، عصر التكنولوجي واللي مينفعش يبقى فيه فجوة كبيرة بينا وبينهم، لازم نعمل لنفسنا update  علشان نعرف نتكلم معاهم بنفس اللغة..

الموضوع مش موضوع تنظيم وبس.. في كل حاجة بنعملها احنا وولادنا، لازم يتعلموا مننا حاجة، يتعلموا مننا إننا احنا بنتعلم طول العمر وبنتطور طول الوقت وبنتكلم بنفس لغتهم.. ساعتها هتتبني ثقة كبيرة بينكم وبدل ما يبعدوا، هيقربوا مننا لأنهم هيحسوا إننا مش بعيد وإننا مش من عصر انتهى.. الموضوع ليه أبعاد كتير جدا، أهمها تواصلنا معاهم طول الوقت..