عايزة الناس تزعل منك؟ تعالي أقولك ازاي تزعليهم كلهم😂😂…
admin2023-10-04T22:49:44+00:00فيه موضوع مهم عايزة أكلمكم فيه النهاردة… احنا كلنا بقينا مشغولين أوي.. ريتم الحياة والمهمات اللي مبتخلصش بتضغط علينا كلنا..
وأحيانا الناس بتلجألنا لأنهم حاطين عشم كبير فينا والمشكلة بتيجي لما كل الناس بيكلموكي فمبتقدريش تكسفي حد ولا إنتي قادرة تخلصي اللي وراكي، فبتقرري إنك تحطي حدود وتقولي أنا هبقى ذوق وفي نفس الوقت أحسسهم إن الوقت مش مناسب دلوقتي، فبتعملي الآتي:
١. بيجيلك اتصال تليفون وانتي لازم تردي وانتي بتبقي في اجتماع أو واقفة بتطبخي أو بتقرئي كتاب مهم فبتردي من باب الذوق وتقولي للمتصل إنك في اجتماع دلوقتي وهتتصلي بيه أول ما تخلصي… فيزعل😡
٢. حد عنده مشكلة ما خصوصا لو كانت مزمنة يعني مش قصة حياة أو موت، هي عايزة تاخد رأيك، فانتي لسه داخلة البيت حالا وواقفة بسرعة تحضري الأكل لولادك وعايزة تلحقي الصلاة وتقولي لولادك يعملوا واجباتهم علشان نازلين التمرين فبتردي عليها-من باب الذوق بردو- وبتقوليلها أنا بس هغدي الولاد وورايا كام حاجة هعملها وأكلمك وأنا نازلة التمرين… فتزعل😡
مرات أخوكي بتتصل بيكي الساعة ٩ مساء علشان تشتكيلك من أخوكي وعمايله وانهم اتخانقوا وانتي وراكي تقرير لازم تخلصيه ومطلوب منك بكرة الصبح وانتي أصلا خلصانة من الشغل والبيت والولاد ويا دوب عايزة تخلصي التقرير ده علشان تلحقي تنامي علشان هتصحي بدري علشان تنزلي ولادك وتروحي شغلك فبتقوليلها، طيب انتي صاحية كمان ساعة؟ هخلص اللي بعمله وأكلمك… فتزعل 😡
بتبقي محتارة 🤔.. أنا كلمتهم بذوق وعملت حدود علشان أقدر أكلمهم في الوقت المتاح ليا، طيب ليه زعلوا؟؟؟
لأنهم متعشمين، لأنك بتسمعيلهم، لأنك بتدعميهم…. حاجة حلوة أوي إن الناس تكون بتلجألك في مشاكلها وانهم بيثقوا فيكي ودي نعمة من ربنا لازم تشكريه عليها لأن الثقة مش سهلة ولأن عليكي دور كبير جدا تجاه عيلتك وأصحابك وقرايبك…. لكن لما بتحاولي تسمعيلهم كلهم وقتك بيضيع ويومك بيخلص من غير ما تكوني أنجزتي حاجة وده بيخليكي متوترة جدا وفي نفس الوقت مش عايزة تزعليهم 🤔 …
نفس الكلام اللي انتي بتقوليه علشان تأجلي المكالمة، ضيفي عليه شوية أحاسيس، الناس بتحب الأحاسيس، بتحب تحس إنك مهتمة بيهم جدا..
يعني في الموقف الأول لما يكون عندك اجتماع ومش هينفع تقفلي تليفونك، ويبتدي المتصل يحكيلك، اسمعيله نص دقيقة بس وبعدين قوليله “الموضوع ده مهم جدا وأنا لازم أسمعك بتركيز شديد، بس عندي اجتماع دلوقتي للأسف.. ينفع أخلص الاجتماع وأكلمك على طول؟ “
في الموقف الثاني، هي نفس النص دقيقة استماع وبعدين تقوليلها ” لا لا الموضوع كبير جدا وأنا مهتمة أوي إني أعرف اللي حصل بس أنا بجري دلوقتي علشان أحضر الغدا، هنزل أوصل الولاد التمرين وأكلمك على طول، إوعي مترديش عليا”..
في الموقف الثالث، بردو بعد النص دقيقة هتقولي “انتي عارفة، أنا كان نفسي ميبقاش فيه تقارير ولا شغل بليل علشان نقعد براحتنا ونتكلم، وعارفة إنك متضايقة جدا وأنا زعلانة علشان انتي متضايقة، ينفع تسهري شوية علشان أخلص التقرير ولا نخليها الصبح أحسن هيبقى الوقت أوسع نتكلم فيه براحتنا؟”
علاقاتنا مع الناس لازم نجاهد علشان نحافظ عليها ومينفعش نفرط فيها بسهولة، علشان كده لازم نتعلم كتير ونطبق كتير لغاية ما نوصل لشكل سليم وصحي في تعاملاتنا مع بعض…
اترك تعليقاً