تنمر بعض الأمهات على بعض.. حقيقة محتاجة وقفة..
أنا لا يمكن أبدا أسيب ولادي وأنزل أشتغل.. أنا مش عارفة بيجيلك قلب ازاي؟؟
معقولة بتنزلي كل يوم الشغل وسايبة بنتك اللي مكملتش سنتين؟ إنتي جبارة.. أنا لا يمكن أعمل كده أبدا..
الجمل اللي من النوعية دي ممكن توجع أي أم.. وغالبا بتبقى فعلا مقصودة إنها توجع.. وأحيانا قليلة اللي ممكن تتقال بدافع الشفقة.. بس تاني، غالبا الشفقة مبتتقالش بالطريقة دي..
من غير تعميم، الأمهات اللي بيقصدوا يوجعوكي، هما نفسهم اللي بيتكلموا عليكي من وراكي.. وهما هما نفسهم اللي ممكن يخبطوكي في ظهرك وانتي مش دريانة.. وممكن جدا تبقى فعلا عايزة مصلحتك ونفسها تساعدك بس بتتكلم من غير ما تفلتر كلامها ولا بتفكر إذا مناسب ولا لأ وبتبقى للأسف مسيطرة و bossy and judgmental جدا..
أنا اتعرضت للنوع الأخيرده قبل كده، وكنت متلخبطة جدا أول ما بقيت أم لأول مرة، ما بين إنها بتنصحني، بس في نفس الوقت بحس بحاجة سلبية وبقوم من القعدة محبطة جدا ومكنتش عارفة ليه.. بالرغم إن فيه ناس تانيين بينصحوني ومكانش عندي مشكلة في ده لأني مكانش لسه عندي خبرة في تربية الولاد ولا في الرضاعة ولا في الأمومة ولا إزاي هشتغل وأنا أم ولا هعرف أنظم وقتي إزاي.. طيب ليه الشخصية دي بالذات كنت بتضايق منها؟؟.. وكنت بقول لنفسي هي مش قصدها حاجة وحشة لأنها عايزة مصلحتي.. لغاية ما عرفت أنا ليه بحس ب ده وقلت لنفسي إنه لأ كفاية بجد، أنا مش قادرة على كم الضيق والهم اللي بحس بيه كل مرة بقعد معاها.. حتى لو هي بتنصحني لكن طريقتها فيها تنمر مخفي جوه النصيحة وده اللي كان بيضايقني.. لكن شوية شوية عرفت أتعامل معاها أول ما وصلت لمصدر الضيق منها..
انتي بتبقي مش عايزة حد يتهمك بالتقصير وفي نفس الوقت إنتي أولريدي عندك أحاسيس بالذنب رهيبة، مش بس إحساس واحد.. لكن في نفس الوقت عندك أسبابك القوية اللي تخليكي تشتغلي.. سواء الأسباب دي مادية أو معنوية..
وفي الحقيقة دي حاجة متخصش حد.. دي حاجة تخصك إنتي وزوجك بس.. تخص إتفاقاتكم مع بعض.. تخص أولوياتكم وتخص تقييمك إنتي الشخصي ل “إزاي هتعملي ده”..
مش الأطفال بس بيتنمروا على بعض، لأ كمان الكبار ممكن يتنمروا على بعض.. ليه؟ لأنها عايزة تحس إنها قوية وإنها تقدر تبقى مسيطرة بس طبعا ده بيظهر بطريقة عنيفة.. الأم دي ممكن تبقى غيرانة منك علشان مش عارفة تعمل زيك.. وممكن تبقى هي هي نفس الأم اللي بتحس بالغيرة لما ولاد الناس التانيين يفوزوا بحاجة.. فتبتقى وسيلتها الوحيدة إنها تحبطك أو تقلل من اللي انتي بتعمليه أو تخلي عندك إحساس بالذنب عالي..
المشكلة إن ثقتك بنفسك ممكن تتهز جدا وتبتدي تشكي في قدراتك وفي أمومتك وفي حبك لولادك كمان..
إذا الأم دي موجودة في حياتك من قرايبك أو صحابك، فيه 10 خطوات تعرفيها علشان متفقديش ثقتك في نفسك ومتتضايقيش :
- اللي الأم التانية دي بتقوله يخصها هي ميخصكيش انتي..
- متحاوليش تردي عليها بنفس طريقتها علشان انتي مش كده وإذا جربتي تعملي ده، هتحسي إن دي مش أخلاقك وهتندمي جدا..
- الأم دي مسكينة غالبا وممكن يكون معندهاش حاجة تفتخر بيها أو نجاحات هي محققاها.. وكمان عندها مشكلة كبيرة في الإحساس بالأمان..
- متضيعيش وقتك في محاولة إثبات إنك أم كويسة ليها أو لأي حد تاني.. You don’t have to prove anything to anybody.
- متضيعيش طاقتك في الجدال أو الخناق معاها، علشان لما بتتخانقي، هي بتحس بالانتصار عليكي.. إوعي تتزحلقي في معارك خسرانة..
- اعرفي إنك مش الضحية الوحيدة ليها.. بس مش كل الناس بتصدق كلامها.. اقفي وقفة مع نفسك وقرري إنك مش هتديها ودنك تاني..
- اشتغلي على نفسك.. يعني علمي وثقفي نفسك في التربية وإدارة وقتك واكتساب مهارات جديدة تقدري إنك تربي ولادك صح وفي نفس الوقت تنجزي مهامك.. ركزي على اللي انتي بتعرفي تعمليه كويس وعلى نقاط قوتك علشان متدخلكيش من نقاط ضعفك..
- خلي عندك عزوة من الأمهات اللي انتي شايفة إنهم إيجابيين وإنك لما بتقعدي معاهم بتبقي مبسوطة.. قابليهم بانتظام علشان تحافظي على حالة إيجابية ونفسية عالية دايما..
- لو كانت من النوع اللي عايزة تنصحك وتسيطر عليكي طول الوقت، قوليلها بطريقة واضحة “ميرسي أوي على النصيحة، بس هي مش مناسبة ليا”..
- ممكن تحددي علاقتك بيها.. متقاطعيهاش لكن متخليهاش تاخد من طاقتك..
الخطوات دي إنتي بتعلمي بيها ولادك إزاي يتعاملوا مع ال toxic people في حياتهم بطريقة راقية من غير ما يتضايقوا أو يفقدوا أعصابهم..
اترك تعليقاً