ازاي نعدي الأوقات الصعبة؟؟

أكتر حاجة ساعدتني أعدي الوقت الصعب اللي كانت ماما الله يرحمها في المستشفى وبعد وفاتها هو الاستعانة بالله والدعاء. طبعا فقد الأم هي من الحاجات الصعبة اللي ممكن تمر على أي حد…

أثناء الأحداث الكتير اللي مريت بيها مكانش عندي وقت إني أعمل أي حاجة تانية وكان جوايا مشاعر كتير طبعا ساعتها تجاه مرض ماما وخوفي عليها والتدهور في حالتها الصحية ونقلها من مستشفى للتانية وعدم مجيء عربية الإسعاف لما نحتاجلها… وكنت كتبت ميل لمؤسسة hand in hand إني بعتذر عن بعض ال sessions وفوجئت بإيميل من باتي ويبفلر مؤسسة hand in hand إنها عايزة تعملي جلسة استماع listening partnership وسألتني إيه أفضل معاد بالنسبالي ورديت عليها بالمعاد…

الميل ده حسسني بدعم رهيب، حسيت إني مش لوحدي وإن فيه ناس بتفكر فيا ودي حاجة جميلة جدا في حد ذاتها…

طبعا أنا كنت نسيت المعاد في وسط اللي أنا فيه وأثناء ماما كانت جوه وحدة الغسيل الكلوي وأنا مستنياها بره، فوجئت بمكالمة من أمريكا، كانت باتي ويبفلر بنفسها وشخصها، قالتلي إنها حابة تقدم لي الدعم وإنها هتعملي one way listening partnership ، يعني هي اللي هتسمعني بس ومش هنتبادل الأدوار ودي حاجة بتتعمل في وقت الطواريء وقالتلي أنا معاكي لغاية ما تخلصي وحتى محددتش وقت…

أنا اتكلمت تقريبا لمدة ساعة إلا ربع وعيطت كتير في المكالمة وعبرت عن خوفي الشديد وقلقي من مرض ماما، واني مش عارفة أقعد مع ولادي خالص ومش بشوفهم، وهي بتسمعني بتركيز شديد وكانت بتساعدني جامد…
المكالة فرقت معايا كتير…

بعد وفاة ماما الله يرحمها، تجنبت أي كلام، مكنتش عايزة أتكلم ومكنتش عايزة حد يسمعني لأني كنت مرهقة جدا.. وهما كانوا محترمين ده جدا، لغاية ما جه وقت بعدها بكام أسبوع واتكلمت عن مشاعري تجاه وفاتها وأد إيه الموضوع صعب، وأد إيه أنا مفتقداها وحزينة وعندي إحساس بالوحدة وأحاسيس كتير جدا اتكلمت عنها… وأد إيه ده فرق معايا مجرد ما اتكلمت..

فعلا إنك تلاقي حد يسمعلك وتحسي إن كل اللي يهمه في اللحظة دي إنه يدعمك ويحسسك إنك مش لوحدك وإنه حاسس بيكي ومتعاطف معاكي وبدون أي غرض، شيء ثمين جدا…

وكل ما بتتكلمي عن مشاعرك أكتر، كل ما بتسمعي نفسك أكتر وبتبقي أكثر قدرة على فهم نفسك وفهم اللي حواليكي..