إنكار المشاعر لا يفيد ….. خالص 😥
فيلم No reservations بتدور قصته حوالين بنت عمرها تقريبا ١٠ سنين اسمها زوي، فقدت مامتها وراحت تعيش مع خالتها اللي كانت بتتعامل معاها كويس جدا وبحنية شديدة جدا لكن بتتعامل معاها من وجهة نظرها هي، يعني مثلا كانت بتعملها الأكل اللي هي نفسها بتحبه وشايفة إنه هو ده اللي المفروض الناس تاكله بغض النظر البنت عايزة تاكل إيه أو متعودة على إيه…
خالة زوي كان شغلها هو كل حاجة في حياتها، وفي يوم، انشغلت جدا في شغلها ونسيت البنت في المدرسة وبعدين راحت جابتها متأخر، ف زوي كانت زعلانة جدا طبعا وقالتلها “انتي نسيتيني” فالخالة أنكرت وقالتلها “لأ منسيتكيش، أنا انشغلت” والبنت مصرة إنها نسيتها والخالة تنكر لغاية ما قالتلها “أيوة أنا فعلا نسيتك وأنا آسفة”…والبنت كانت كل ده قدام المدرسة مش عايزة تتحرك من مكانها لغاية ما خالتها زعقتلها وقالتلها اتحركي..
لما روحوا البيت، البنت كانت قافلة على نفسها ومش عايزة تكلمها، ف خالتها عملت أحسن حاجة ممكن تتعمل في الموقف ده… راحت لها اوضتها وفتحت لها قلبها وكلمتها بهدوء شديد جدا وقالتلها إنها عارفة إنها بتعمل كل حاجة غلط بس هي بتحاول جامد جدا علشان تسعدها.. وبعد حوار هاديء فيه تفهم كتير جدا، البنت قالتلها “إنتي مش كل حاجة بتعمليها غلط” وبدؤوا يفهموا بعض والتعامل بينهم بدأ يبقى أسهل كتير…
♥️اللي عايزة أقوله :
١. أحيانا كتير بنعمل اللي في مصلحة ولادنا من وجهة نظرنا بغض النظر عن رأيهم أو إحساسهم… إحنا لازم نشاركهم في كل حاجة تخصهم حتى لو هنمشي رأينا في الآخر بس ولادنا لازم يحسوا إنهم ليهم قيمة وليهم رأي وبيتاخد في الاعتبار مهما كان سنهم صغير لأن ده بينمي فيهم مهارات اتخاذ القرار والحكم السليم والثقة بالنفس…
٢. الهدوء في التعامل نتايجه أفضل كتير من الشدة والزعيق لأننا بنقدر نسمع بعض كويس ومبنتخذش موقف عدائي أو هجومي تجاه أي كلام بيتقال والكلام ده ينطبق علينا وعلى ولادنا…
٣. عدم إنكار الموقف، يعني البنت كانت متأكدة ان خالتها نسيتها وإنكار ده مكانش مفيد لموقف الخالة بالعكس وقفت في موقف وحش إنها بتكذب.. فإحنا لما نغلط، عادي إننا نعترف بخطأنا ونعتذر عنه كمان.. حد دلوقتي هيقول بس أنا كده مبخليش فيه هيبة بيني وبينه… هقول إن الهيبة مواقف وبالعكس تماما الهيبة هتروح لما ابنك يلاقيكي بتكذبي وبتنكري حاجة باينة جدا وده بيكسر الثقة اللي بينكم.. تاني حاجة إنتي هتعلميه ازاي إنه يعتذر عن الأخطاء اللي بيعملها إذا إنتي مبتعمليش كده معاه.. تالت حاجة الاعتذار بيحتاج شجاعة وقوة نفس، و لما تعتذري إنتي بتربيه على عدم الكِبْر وعلى قوة الشخصية…
اترك تعليقاً