إزاي تحلي أي مشكلة في 10 خطوات…
الدنيا ضلمت في وشي… أنا خلاص معنديش حلول… أنا مش عارفة أعمل إيه تاني…
حسيتي إنك فجأة معندكيش حلول ولا بدائل؟؟
أم شافت ابنها اللي عنده 14 سنة بيشرب سجاير… أم جارتها كلمتها وقالتلها إن ابنها اللي مكملش 16 سنة كان سايق عربية صاحبه بسرعة جدا وفي شارع رئيسي… أم شافت بنتها على story على الانستجرام وهي قاعدة وسط أصحابها بتشرب شيشة… أم سمعت بنتها بتتكلم في التليفون مع واحدة صاحبتها على ولد زميلهم وإن إزاي أمور وهي عندها crush عليه..
مشاكل كتير ممكن تواجهنا وبنحس بالعجز قصادها وبنحس بجد إن الدنيا انتهت..
في بوستات كتيرة اتكلمنا على حلول للمشاكل دي، لكن البوست ده أنا عايزة أتكلم عن الأم لما تلاقي نفسها الدنيا قفلت في وشها، تعمل إيه علشان تقدر تلاقي حل لمشاكلها أيا كانت….
احنا في وقت توترنا، مخنا بيقف، كتير مبنعرفش نفكر ولا نحلل ولا نخطط لأي حاجة، بنحس بالعجز، إن الدنيا وقفت وإن مفيش حل أو إن مفيش غير حل واحد ولو معرفتش أعمله يبقى الدنيا هتبوظ..
لازم دايما عندنا مرونة في التفكير..
كتير لما ولادنا بيتكلموا معانا بيبقى رد فعلنا سريع وكتير بيبقى متهور وبنرجع نندم عليه بعد كده…
لما تقابلنا مشكلة مش عايزة تدخل سريع أو حل فوري، يبقى لازم نقف pause ونسأل نفسنا كام سؤال:
- هو حقيقي فيه مشكلة ولا أنا متوترة دلوقتي ومش عارفة أفكر؟..
- هل ولادي في مرحلة مختلفة دلوقتي وأنا لسه مفهمتش طبيعة المرحلة وإني محتاجة أغير طريقتي معاهم وأفهم أكتر عن المرحلة دي؟..
- لو عندي 1% شك إني ممكن أكون متوترة وإن المشكلة مش ضخمة، يبقى ممكن أفكرفي أي حاجة تانية أو أعمل حاجة أشغل نفسي بيها لمدة ربع ساعة علشان أهدى وأقدر أقيم حالتي النفسية وبعدين أرجع أفكر في الموضوع تاني..
- أتكلم عن مشاعري الحالية مع حد علشان أخفف الضغط والتوتر من مخي شوية أو على الأقل ممكن أكتب اللي أنا حاسة بيه…
ممكن كمان تغمضي عينيكي لمدة 5 دقائق وتركزي على نفسك، شهيق وزفير، تحسي بإيدك، برجلك، المهم إنك متفكريش في أي حاجة غير في اللحظة الحالية اللي إنتي فيها لغاية ما تهدي… - علشان متغرقيش في دوامة المشكلة ومخك يستهلك في التفكير فيها، احرصي إنك تبتدي تفكري في حلول، يعني بدل ما تضيعي وقت على “ليه بيحصلي كده؟” أو “أنا مستاهلش كده منهم” أو ما إلى ذلك من الجمل اللي بتجيبلنا اكتئاب، نبتدي نجزأ المشكلة لأجزاء أصغر علشان نقدر نفكر في جزء جزء لوحده ونقدر نحلها ونشوف إيه الخطوة الصغيرة اللي ممكن آخدها الأول في طريقي لحل المشكلة دي؟ ، دايما لما بنمشي baby steps الموضوع بيبقى أفضل بكتير…
- حطي في دماغك وخلي عندك يقين وحسن ظن بالله إن فيه دايما بدائل وكوني على وعي إن فيه بدائل بس انتي مش شايفاها دلوقتي، بس لما مخك يرتاح والتوتر يقل هتعرفي تشوفيها كويس..
- اكتبي ليستة بالبدائل واحدة واحدة، ممكن ييجي في بالك حل واحد دلوقتي، اكتبيه ولما تجيلك فكرة تانية، اكتبيها بسرعة قبل ما تنسيها، مش مهم هي هتنفع ولا لأ دلوقتي، ده مش وقت تقييم الأفكار، ده وقت تجميع الأفكار… هتلاقي اتجمع عندك مجموعة أفكار وحلول لا حصر لها…
- ابدئي بأسهل حل إنتي ممكن تعمليه في الأول، المهم تبتدي تحلي تشابك المشكلة، مش شرط إنه يكون أفضل حل لو الأفضل مش في مقدرتك..
- السؤال المهم جدا: أنا هستفيد إيه من المشكلة دي، إيه الحاجة اللي أنا هخرج بيها من المشكلة تفيدني في حياتي وطريقة تعاملاتي مع ولادي ومع الناس عموما…
- الاستعانة بالله و الدعاء أهم حاجة إن ربنا يفرج الكرب ، هو قادر على كل شيء..
اترك تعليقاً