أنانية الأبناء

وأنا صغيرة كنت لما آكل حاجة وتعجبني، كنت بحب إن مامتي تدوق معايا، فمكانتش بترضى وتقولي لأ خليها ليكي كلها، وكنت بتضايق أوي لأني ببقى عايزاها تاكل معايا (طول عمري مبحبش آكل لوحدي 😂)، وافتكرت إنها مبتحبش الشكولاتة ولا الشيبسي والفشار والحاجات بتاعة العيال الصغيرين دي لغاية ما بقى عندي قناعة تامة إن الناس الكبار مبيبقاش نفسهم في حاجة، مبيبقوش عايزين حاجة من الدنيا خلاص، وإنهم مينفعش ياكلوا الشوكولاتات والحاجات العيالي دي..

وفي يوم مامتي طلبت مني شوكولاتة lion، فاستغربت جدا، هما مش الناس الكبار مبيبقاش نفسهم في حاجة خالص؟ بس هي كانت الله يرحمها بتحب النوع ده جدا…

والسؤال ده خلاني أقف مع نفسي شوية وأفكر والحقيقة إن ال overthinking عندي عالي، لازم أفكر وأحلل كل حاجة بتتقال أو بتحصل حواليا 😅.. فكرت إنه أكيد بردو الناس الكبار بيشتهوا حاجات وبيبقى نفسهم بردو يدوقوا ويجربوا حتى لو الحاجات بتاعة العيال الصغيرين اللي اكتشفت بعد كده إنها مش بتاعة الصغيرين وبس….. بس علشان ماما دايما كانت مبتحبش تاخد مني حاجة ظنا منها إنها هتبقى السبب في إنها تخلص أو إن استمتاعي بيها هيقل – وده طبعا حسن نية وإيثار وكل حاجة كويسة بس مبالغ فيها حبتين، لأن ده كان كفيل جدا إنه يطلعني شخص أناني مبيفكرش غير في نفسه وفاكر إن الكون يتمحور حواليه…

الحمد لله ربنا سترها معايا ومطلعتش كده 😄، بس الإيثار الزائد والحرص المبالغ فيه ممكن جدا يطلع أولاد أنانيين ومحدش يبقى عارف هما ليه كده مع إن أهاليهم مش كده خالص…

الأم لما بتضحي أوي وبتدي أوي، محدش بيديلها الحق إنها تاخد، لأنها هي اللي رسمت القالب ده لنفسها وللي حواليها واتسجنت فيه… الأم لما بتنكر ذاتها طول الوقت وتفكر إنها ملهاش الحق في الراحة أو الاستمتاع، الفكرة دي بتخلي الناس اللي حواليها يعاملوها بالطريقة دي ويستغربوا جدا إنها عايزة ترتاح..

اللي انتي بتحسيه بيوصل للناس، واللي انتي شايفة إنك ملكيش حق فيه، محدش هيديهولك.. عاملي نفسك بالرفق والإحسان علشان اللي حواليكي يعاملوكي بنفس الطريقة…