التنمر.. من الآخر

استقويتي على مين النهاردة؟

عمرك اتعرضتي لموقف حسيتي فيه إن حد بيستقوى عليكي؟ . طيب حد قالك إنك قصيرة أوي أو طويلة زيادة، أو شعرك قصير أو سمرة أو طالعة وحشة لمين؟… طيب وانتي حامل، حد قالك انتي مناخيرك كبرت أو إنت تخنتي كده ليه؟ (دول بقى أغرب ناس دي بجد، يعني يبقى عندها بيبي و هورموناتها ملخبطة وحد يقولها انتي تخنتي؟!!!…

طيب عمرك قولتي لابنك، انت غبي و عمرك ما هتفهم؟… طيب قولتيله أنا مش طايقة أشوف وشك؟ شكلك بينرفزني؟… طيب زعقتيله وعاقبتيه قدام الناس وخليتيه عبرة لمن يعتبر؟

ماما الله يرحمها كانت دايما تقولي على الشخص اللي بيؤذي الناس إنه “غلبان في عقله” وأنا كنت أستغرب جدا من الكلمة دي، إزاي يبقى غلبان و في نفس الوقت متجبر بالشكل ده؟.. أخدت وقت طويل علشان أفهم يعني إيه “غلبان في عقله” على بعضها…

مدارس كتير و برامج كتير بتتكلم على التنمر.. وفيه ناس معترضة أصلا على اللفظ ده على أساس إنه لفظ غريب وعايزين يستبدلوه بكلمة “سخرية”..

طبعا كلمة سخرية أو استهزاء غير معبرة إطلاقا عن المعنى المقصود وقاصرة جدا.. لكن بغض النظر عن التلاعب بالألفاظ، التنمر هو المقصود بيه إن الناس تستقوى على ناس تانيين..

وعايزة أقولكم إن برغم حملات التنمر في المدارس إلا إن الموضوع بينتشر جدا ومفيش فايدة..

كتير من الناس بتستقوى على بعض.. الأم بتستقوى على ابنها و الزوج بيستقوى على مراته، والمدير بيستقوى على الموظفين والموظف بيستقوى على المواطن و سلسلة تعمل أحلى كوكتيل لمجتمع مريض…

زي ما انتم عارفين أنا مش هتكلم عن الحلول على طول (أنا عمري عملت كده بردو؟  .. لازم نمسك جذور الموضوع وأسبابه و لما نفهمها كويس و نستوعبها هنقدر نحل الموضوع كله..

✨ خليني أقول إن التنمر أو ان حد بيستقوى على حد ليه نوعين:

🎯 النوع الأول: هو التنمر المباشر و هو عبارة عن سخرية و تريقة، شتيمة، تهديد، ضرب، … و ده التعامل معاه سهل و مباشر بردو…

🎯 🎯 النوع الثاني: تنمر غير مباشر عن طريق نشر إشاعات عن الشخص المتنمر عليه، و انه يوقع بين الشخص و بين الناس التانيين، و يبعده عن بقية المجموعة بأي شكل وأكيد الشكل ده مش أخلاقي خالص.. و بياخد وقت في اكتشاف ان الأحداث دي حصلت فعلا واكتشاف كمان الشخص اللي بيعمل كده..

✨ إيه اللي بيخلي الناس تعمل في بعضها كده أصلا.. تعالوا نشوف أسباب التنمر:

1- أسباب خاصة بالشخص نفسه أو المتنمر شخصيا: يعني إنه يبقى حاسس من جواه إنه ضعيف و powerless وعنده إحساس بالهزيمة، أو إنه هو شخصيا حد استقوى عليه فعايز يلعب دور الأقوى، أو إنه حاسس إنه مهمّش و ملوش لزمة فعايز يلفت الانتباه، أو إنه يحس إن عمره ما نجح قبل كده فبيحس بالغيرة من أي حد ناجح فمبيقدرش يتحمل وجود الناجحين في حياته فيبتدي محاولات الانتقام والتشويه من الشخص الناجح..

2- أسباب خاصة بالمتنمّر عليه (الشخص اللي بيتأذي): إنه يلتمس للمتنمرين العذر في الغيرة أو إحساسه بالضعف أو ظروفه الوحشة اللي أدت انه يبقى شخص متنمر بغيض أيا كانت أسبابه..

3- أسباب خاصة بالناس التانيين: و هما إنهم يسقفوا للمتنمر علشان يتقوا شره و ميجيش ناحيتهم..

✨ لو اللي بيتأذي موقفش للي بيأذوه وعمل الحلول اللي هنقولها بعد شوية صغيرين، هيتأثر جدا، إزاي؟:

1- بيفقدوا الثقة في نفسهم و في طريقة حكمهم على الناس خصوصا لما المتنمر يبقى من القرايب، تلاقوا كل القرايب التانيين بينفوا إن قريبهم بيتنمر أصلا و إنه ليه واخدين كلامه كده وبالتالي اللي بيتأذي بيحس نفسه إنه لوحده من غير أي دعم..

2- ممكن تتكون عنده مشكلة في علاقاته من الناس التانيين من كتر الضغط اللي بيتعرض له..

3- أحيانا بيحس بعدم الاستحقاق للحاجات الكويسة في الحياة، يعني ال self-worth عنده بيقل جدا و رؤيته لنفسه بتتهز..

✨✨ الحل بقى؟؟؟

📌 أولا: NEVER EVER IGNORE BULLYING ، تجاهل التنمر بيخلي المتنمر يفتكر ان اللي قدامه ضعيف و يسوق فيها و يؤذيكي أكتر.. هو دايما محتاج حد يحط له حدود..

📌 ثانيا: لو هو حد مش بيهمك ولا انتي حريصة إنه يبقى موجود في حياتك، قوليله “مش هسمحلك إنك تتكلم معايا بالأسلوب ده”، “مش قابلة طريقتك في الكلام”.. أو أيا كانت الجملة اللي نوقفه.. والكلام ده لازم يبقى بشكل مستمر..

📌 ثالثا: لو حد قريبك أو مينفعش تخسريه.. قوليله “بصي إنتي حبيبتي، بس أنا مبحبش حد يتكلم معايا كده أو يتكلم معايا في المواضيع دي”.. و إوعي تحسي إنك متقدريش تقولي الكلام ده أو إنك كده بتحرجيها أو إنها ممكن تكون متقصدش، هي اللي بتأذيكي وتحرجك..

📌 رابعا: خليكي هادية أو بمعنى أصح “باردة” وانتي بتتكلمي مع المتنمر..

📌 خامسا: المتنمر بيحب يستفرد بفريسته لوحدها، ف دايما خليكي في وسط صحابك الداعمين علشان متحسيش انك لوحدك، المتنمر مبيهاجمش حد في وسط جماعة..

📌 سادسا: الغلبان في عقله ده على رأي ماما الله يرحمها محتاج تعاطف وده مش عكس اللي أنا قولته في النقط الأولانية، بالعكس ده لازم يحصل بس بعدها، بعد ما نحط له حدود وقواعد للتعامل معانا، لازم نوريه إننا متعاطفين مع ضعفه الداخلي وإننا بنفصل بينه ك بني آدم و بين سلوكه اللي احنا رافضينه..

⚡️⚡️ و في الآخر، لكل اللي بيتأذي في هذا العالم، قووا نفسكم وقووا ولادكم..

⚡️⚡️ و لكل اللي بيؤذي حد تاني في هذا العالم، ربوا نفسكم و ربوا ولادكم..