ازاي تطفي النار الوالعة بين جوزك وبين ولادك بعد رجوعه من السفر؟؟

ازاي تطفي النار الوالعة بين جوزك وبين ولادك بعد رجوعه من السفر؟؟

بحكم الشغل وأكل العيش، الأزواج بيسافروا ، بعضهم لمدد قصيرة وبعضهم لمدد طويلة.. كتير مننا جربوا يعني إيه جوزك يبقى مسافر ولما يرجع يستقر، بتبتدي المشاكل..

المشاكل دي بتبقى مع الزوجة ومع الولاد كمان، لأنهم اتعودوا يطلبوا كل حاجة من مامتهم واتعودوا على نمط حياة معين ونظام وروتين معروف لكل الأسرة… إلا الأب، بيبقى يا عيني تايه ما بين مواعيد تمارين، لدروس، لحفلات مدرسة، لخروجات وهو مش قادر يستوعب النظام ومحدش بيفهمه بالراحة  لأن محدش عنده وقت وده نظام حياتهم بقالهم سنين..

الأب في الحالة دي بيشوف إن ده إهمال ليه، فيبتدي يحس بالغضب.. وبيبقى عايز يحس بكيانه وسط عيلته فيبتدي يزعق ويتنرفز علشان ابنه خارج من غير ما يقوله أو إن بنته عندها تمارين 3 مرات في الأسبوع فبيبقى مستتقل إنه يوصلها أو إنه حتى مامتها تروح تقعد معاها في النادي لغاية ما تخلص..  وممكن يتهم الأم بإنها مش واخدة بالها من البيت وإن البيت كده بقى سايب ولازم يعمل نظام جديد مفيهوش خروج كتير.. ومش فارق على فكرة إذا هما بيخرجوا للدروس أو للتمارين أو بيخرجوا يتفسحوا، بالنسبة للأب الخروج كله مزعج لأنه كان قاعد لوحده فترات طويلة ومش متعود على الدوشة الكتير..

الأم والولاد الناحية التانية شايفين إن ده نظامهم بقالهم كتير وإنه فعلا كان بيشوف كل الكلام ده لما بييجي أجازات ومكانش بيعلق على حاجة وإن كل حاجة كانت بتتحكيله في التليفون سواء من مراته أو الولاد، فبيبقوا مستغربين هو ليه اتغير فجأة وبقى عصبي بالشكل الفظيع ده .. ويبتدوا يحسوا بالخنقة وياخدوا جنب منه.. ويبتدي يبقى فيه جبهتين في البيت، الولاد في ناحية، والأب في ناحية تانية.. أما الأم فبتبقى مفرومة في النص، بتصحح مفاهيم للأب وبتحاول تقوله انت عارف نظام حياتنا كله والولاد مش وحشين وفي نفس الوقت بتنفي عن نفسها تهم الإهمال في البيت وتبويظ العيال وإهمال الأب شخصيا..

فيه كذا أسلوب للتعامل في الحالة دي، بس كلهم هيبقى دورك رئيسي فيهم علشان المركب تعدي بسلام والنار الوالعة تنطفي:

  • حطي نفسك مكانه، هو مينفعش يحس إنه مش عارف اللي بيحصل حواليه، بردو حاجة مش لطيفة.. فيه فترة انتقالية هتبقى الأمور غريبة شوية.. عارفين الترقب الحذر؟ هو ده.. ف أحسن طريقة لللتعامل في الموقف اللي زي ده هو إنك تديله وضعه الكامل، يعني ” الكلمة كلمتك والشورة شورتك يا سي السيد، هو احنا نقدر نعمل حاجة من غيرك؟” .. الولاد ياخدوا رأيه في كل حاجة، يبتدوا يحكوا اللي بيعملوه في دروسهم ومدارسهم وتمارينهم.. بعد شوية هو هيزهق من كتر الحكايات، مش هيستحمل صدقيني ويرجع للطبيعي..
  • افتحي ألبوم الصور بتاعكم سواء كان ورقي أو ديجيتال : احكي حكايات عن باباهم معاهم وهما أطفال وخصوصا لو تضحك.. قصص الذكريات دي هتخلي الأطراف كلها تبقى مشتاقة للعلاقة اللطيفة بتاعة قبل كده..
  • رتبي خروجات للأسرة كلها مع توصيات لكل طرف لوحده إنه يخلي الخروجة لذيذة على أد ما يقدر ويفوّت اللي ميعجبوش..
  • شجعيه إنه ياخد الولاد ويخرجوا لوحدهم علشان يتعرفوا على بعض من أول و جديد، مع توصيات للأب من نوعية “خليك كول و فريش ومتقفشّ”
  • اخرجي معاه لوحدكم علشان يحس بالاهتمام منك، ودي من أهم الحاجات اللي كلنا محتاجين نعملها، مش بس لما أزواجنا يكونوا مسافرين.. افطروا مع بعض بره البيت أو تبقي عاملاله فطار مميز ليه هو بس.. انزلوا اتمشوا مع بعض من غير هدف، يعني لا رايحين تجيبوا طلبات ولا نازلين رايحين مشاوير.. هدف الخروجة هي إنكم تتمشوا.. أو تفطروا أو تقعدوا مع بعض في النادي.. بس كده..

ممكن الموضوع ياخد وقت شوية.. بس العلاقات جوه البيت هتتظبط لما النية تكون موجودة والتحدي في مين اللي هيكسب يقل..

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *