بنتك مش بتحب الحجاب؟؟
انتي قلقانة أحسن بنتك تقلع الحجاب، أو هي بتقولك كده كل فترة.. أو حتى انتي عايزاها تلبس الحجاب وهي مش عايزة تعمل الخطوة دي
..
..وانتي قلقانة.. وبتحسي بكرب رهيب جدا؟؟
..
..أنا نفسي، فكرت أقلع الحجاب مرتين، وعلى عكس المتوقع من ماما الله يرحمها لأنها كانت شديدة شوية، اتعاملت في الموضوع ده بالذات بهدوء شديد جدا وحكمة وصبر بالغين.. ويمكن حكمتها وهدوءها ده اللي خلاني أسكت تماما ومتكلمش فيه تاني ابدا ولله الفضل
..
..في البوست ده، أنا أكيد مش هتناقش إذا الحجاب فرض أو لأ، لأني مش بتناقش في مسلمات مفروضة من رب العالمين..
طيب خلينا نعرف ليه بعض البنات بيبقوا عايزين يقلعوا حجابهم؟.. الأسباب متنوعة جدا وكتيرة :1. الفتن اللي حوالينا في كل مكان واللبس اللي حالته بقت صعبة، وهما لما بيشوفوا صحابهم لابسين براحتهم، بيبقوا عايزين يعملوا زيهم لأنهم لسه معندهمش القوة النفسية إنهم يقاوموا..
2. معظم المراهقات (والمراهقين طبعا) بيمروا بأزمة هوية في السن ده ، فبتبقى عايزة تجرب وتستكشف وتتمرد على أي حاجة وكل حاجة ..
3. أحيانا بنتك بتعبر عن حاجات مضايقاها عن طريق إنها تشيل الحجاب، وعلشان كده محتاجة تفهمي ايه اللي مضايقها و مخليها بتفكر كده، ممكن مثلا يكونوا صحابها بيضايقوها وبيتريقوا عليها وهي فاكرة إن الحل إنها تقلع الحجاب علشان تبقى محبوبة أكتر وتبقى شبههم متبقاش مختلفة عنهم..
4. ممكن تكون حست إنها استعجلت ولبست الحجاب من بدري، ومكانش فيه تهيئة كفاية أو فهم لمشاعرها كويس في الفترة دي..
5. لأنها حاسة إن لبسها وحش أو طرحتها مش لايقة على وشها أو مبهدلة، ف بتحس إنها فقدت شياكتها وبقى شكلها مش حلو زي صحابها..
6. لأنك ممكن تكوني قولتيلها “البسيه علشان عيلتنا بتلبسه وكل البنات في عيلتنا محجبات ومينفعش تبقي مختلفة عن بقية بنات العيلة”..
هتخسري كتير لو قولتي كده، وهي هتعند أكتر لأن المبدأ ده مش صح.. ملناش دعوة بالناس ولا بكلام الناس..
لو بنتك جت تقول “أنا عايزة أقلع الحجاب علشان زمايلي كلهم مش محجبات، وعلشان محدش فيهم يقولي إنتي مش زينا أو يحرجني”، هتعملي إيه؟؟..
طيب لو بدأتي تقوليلها طبعا مش صح، و احنا المفروض نتقبل بعض.. هتقولك طيب ما أنا متقبلة أي حد لابس مختلف عني، هما اللي مش قابلنّي.. لو قلتيلها احنا كلنا مختلفين عن بعض وكل واحد ليه دماغه، هتقولك وليه أحط نفسي في موقف أبقى مختلفة عن بقية الناس اللي حواليا؟؟..الكلام اللي هتقوليه وهي مش هتحس إنه عادل بالنسبالها، هترد عليه وهتبقى حجتها قوية..
يبقى نحط الكلام في سياق مقبول بالنسبالهم علشان نعرف نتكلم مع بناتنا..
طريقة تعاملك مع المواقف اللي بتمر بيها بنتك في الموضوع ده هتفرق جدا في علاقتك مع بنتك.. كلامك لازم يبقى موزون لأقصى حد..1. أول وأهم حاجة إنك تسمعي هي حست بإيه لو اتعرضت لكلام مش لطيف إنها محجبة.. شجعيها تقول كل حاجة.. ممكن تقولك مخنوقة ومكتئبة ومقبوضة.. مشاعر كتير أوي، اسمعيها كويس و مستهونيش بيها أبدا..
اعرفي إن أي إحساس هي بتقوله مش مبالغ فيه، ومتحاوليش تناقشيها في إحساسها، لأنها مشاعرها هي..
2. اسأليها الإحساس اللي عندها ده تديه كام من عشرة؟؟ علشان تعرفي مدى قوته.. وأد إيه الموضوع مضايقها..
3. اسأليها إيه الكلام اللي بتقوله لنفسها دايما.. شايفة نفسها إزاي.. دي فرصة ذهبية لتصحيح أي صورة مشوهة عن نفسها، زي إنها بتقول لنفسها إنها مش حلوة، أو شايفة نفسها أقل من صحابها، أو معندهاش ثقة في نفسها.. هتفهمي كتير أوي عنها..
4. بلاش إصدار أحكام عليها علشان هتقفل من الحوار قبل ما يبتدي..
5. حسسيها بالأمان، علشان تقدر تحكيلك أي حاجة ودايما يبقى فيه تواصل مستمر بينكم علشان تحس بالحرية وهي بتكلمك… ادعميها جدا دلوقتي، دي أكتر حاجة محتاجاها منك..
6. اسمعي من غير عصبية ولا توتر.. اسمعيلها ومخك وقلبك مفتوحين.. ممكن جدا يبقى فيه توتر كبير في حياتها وهي معتقدة إن قلعها للحجاب هو الحل..
7. ابدئي بسماع وجهة نظرها كاملة، متحاوليش تعدلي عليها، استني عليها لما تعبر عن نفسها بطريقة كاملة، وعيدي الجمل اللي قالتها، و اسأليها إذا انتي فاهمة صح ولا لأ، هي هتحس منك باهتمام كبير جدا و هتقول كلام كتير..
8. اتكلمي دايما عن القيم بتاعة بيتكم، ويعني إيه كل عيلة عندها قيم مختلفة عن العيلة التانية..
9. قوليلها لو مكانش الحجاب فرض، أنا كمان نفسي أخرج بشعري، مين يكره الحرية (حسسيها إنك فاهماها وإن اللي بتفكر فيه بييجي في بالنا كلنا)، و لكن أنا مأجلة الحرية دي للجنة ان شاء الله، أعمل فيها اللي أنا عايزاه.. واللي بيسيب حاجة حبا في ربنا، ربنا بيعوضه عنها..
قال تعالى: ومن يتق الله يجعل له مخرجا ويرزقه من حيث لا يحتسب {الطلاق: 2ـ3}.
النبي صلى الله عليه وسلم قال: إنك لن تدع شيئا ابتغاء الله إلا آتاك خيرا منه
10. كلميها دايما إنها إزاي تبقى راسها مرفوعة إنه بتطيع ربنا ولابسة كويس.. وإن ربنا فرض علينا الصلاة والصيام والصدق والحفاظ على ممتلكات الناس والحجاب ، إلخ…
11. إذا لقيتيها منساقة ورا صاحباتها اللي بيتكلموا بطريقة مش حلوة على حجاب واحدة تانية أو بيعملوا stereotyping، اتكلمي معاها كتير في الموضوع ده.. متسيبيهوش.. ابدئي كلامك بفرضية إنها مكان البنت التانية، هتحس بإيه؟ هل هي هتحب الإٌحساس ده؟..
12. العلاقات الاجتماعية المتنوعة والأعمال التطوعية بتقويها وبتزود ثقتها بنفسها وبتخليها تحس بقيمتها وبقيمة اللي بتعمله، ف مش هتحس انها فيها حاجة غلط لو واحدة قابلتها بهجوم.. هتعرف إن اللي بيهاجمها هو اللي غلط..
13. اقترحي عليها تغير ستايلها في اللبس، ابعتيلها صفحات عن بلوجرز محجبات وشيك وناجحين في نفس الوقت، فالصورة الذهنية السلبية اللي هي حاطاها في دماغها ممكن تبقى أحسن.. انتي كمان محتاجة تتابعي بلوجرز bloggers علشان تبقي مطلعة علشان تتكلمي معاها بلغتها.. كتير من صفحات الإيشاربات والهدوم بتوع ناس في منتهى الشياكة والرقي، محتاجين نبقى دايما عارفينهم.. و صفحات الفاشون مليانين بنات شيك وستايليش stylish اللهم بارك ويفتحوا النفس على الحجاب..
14. لو قالتلك، اللي بتقلع الحجاب مبتبقاش كافرة، دي بتعمل ذنب بس و المهم إن قلبنا يبقى نضيف.. قوليلها: انتي صح، هي مش كافرة طبعا، هي بتعمل ذنب بس، وكلنا بنعمل ذنوب، احنا مش ملايكة.. واسأليها “هل هتقدري تتحملي الذنوب اللي هتاخديها؟؟”.. هنا هي محتاجة شوية تصحيح مفاهيم.. قوليلها، متستصغريش الذنب علشان احنا منعرفش ميزان ربنا.. وعلشان قلبنا يبقى نضيف، لازم نسمع كلام ربنا.. احنا لو قولنا الكذب ذنب وإيه يعني لما نعمله، والسرقة ذنب، والغش ذنب، احنا كده فين حدودنا اللي ربنا فرضها علينا لما احنا هنستصغر كل حاجة؟؟؟ واسأليها عن قلبها.. بتحب ربنا؟ اللي بيحب ربنا بيطيعه.. الحب والطاعة لله مرتبطين ببعض..
15. وانتي بتتكلمي معاها، متحكميش على البنات إذا كانوا كويسين أو لأ بحجابهم وبس، انتي كده دخلتي معاها في منطقة غلط.. علشان المحجبات بشر وبيغلطوا، و فيه محجبات كتير بيعملوا حاجات غلط وفيه مش محجبات كتير بيعملوا كل حاجة صح، فمقياس شخص كويس أو وحش على المعيار ده مينفعش أصلا، هتخسري في مناقشتك معاها..
16. الصحبة، من أهم الحاجات في حياة كل مراهقة، هي أصحابها.. ف لو انتي من الأول حاطاها في المجتمع اللي انتي عايزة تربيها على قيمه، صحبتها هتبقى كويسة.. وبردو الصحبة الكويسة متضمنش إنها مش هتبقى عايزة تقلع الحجاب لكن على الأقل، بيقلل فرص إنها تنفذ حاجة زي دي.. لأن الصاحب ساحب..
17. فهميها أكتر عن دينها وكلميها عن صلاح القلب وازاي ننضفه ونشيل الصدا من عليه كل شوية.. وإن الله اللي خلقنا أعلم بينا مننا و إنه هو وحده اللي يعرف إيه اللي ينفعنا وإيه اللي مينفعناش..
موضوع الحجاب بالذات عايز تهيئة من صغرهم و تحضير كتير، من غير شدة ولا تخويف.. خليها دايما تسمع كلام جميل عن الحجاب وتشوفك وانتي دايما شيك ومهتمة بحجابك ولبسك… سمعيها رقائق تعلق قلبها بيه من قبلها بشوية.. خليها تفهم إن الحجاب أعمق من كونه مجرد إيشارب بيتحط على الراس..
الكلام ده كبير على إنها تستوعبه من مرة واحدة، علشان كده، اقعدي معاها كتير جدا، اسمعي حتى لو قالت كلام مش مقنع أو مش لطيف، معلش استحملي.. و في الآخر ندعي ربنا إنه يلطف بينا و ينور بصيرتنا و بصيرة بناتنا و ولادنا..
ادعي ربنا كتير بصلاح حالها وقلبها.. في الأول والآخر، ربنا بيقلب القلوب، واحنا مفيش في إيدينا غير الدعاء بيقين و نحسن الظن بالله..
اترك تعليقاً