لو دايما بتقوليلها إن ريحتها مش حلوة، او بتقوليلها انتي مستحمتيش بقالك أد إيه؟؟.. الكلام ده بيخليها متهتمش بنظافتها ولا تستجيب لكلامك خالص
..
وانتي تستغربي إزاي هي مش مهتمة؟؟.. وإزاي هي سايبة نفسها يبقى شكلها وحش قدام الناس بالطريقة دي
..
الأول خليني أقولك إن معدلها في الاستحمام هو نفسه من وهي صغيرة.. يعني مفيش حاجة غريبة طرأت عليه كشخصية
..
ولكن حقيقي هما مساكين جدا بجد
..
تعالي أقولك ليه أنا بقول كده..

من بداية فترة المراهقة والبلوغ (من ١٠ أو ١١ سنة)، بيحصل تغيرات فسيولوجية وهرمونية كتير، وده بيؤدي إلى أن الغدد العرقية بتنشط جدا وبتفرز مواد كيميائية مختلفة في العرق، كل ده مع البكتيريا، بتخلي ريحة العرق أقوى بكتير.. والرائحة دي بتبقى أقوى في مناطق معينة..

عايزين ننتهز فرصة إننا في الشتاء دلوقتي علشان نعلم بناتنا (وولادنا اللي هيعلمهم باباهم) كل ما يخص النظافة الشخصية، علشان لما ييجي الصيف تكون اتعلمت ومتحطش نفسها في مواقف محرجة..

هتكلميها ازاي؟؟.. عشر خطوات بسيطة جدا:
١. قوليلها المعلومات الطبية اللي أدت إلى تغير الرائحة، زي ما أنا شرحتها فوق وبالتفتصيل، وقوليلها الكلام كله بمنتهى التعاطف والهدوء.. دي فرصة تعليمية عظيمة، محتاجين ننتهزها، ومينفعش تبقى فرصة للتهزيء أبدا..
٢. علميها ازاي نتغلب على الرائحة دي عن طريق الاستحمام يوميا باستخدام صابون خفيف زي صابون الجلسرين أو غيره، علشان الصابون اللي فيه كيماويات كتيرة بيعمل جفاف في الجلد..
٣. عرفيها على منتجات إزالة الرائحة وعرفيها الفرق بين منتجات مزيل العرق المختلفة واللي منها بيعمل اسوداد في الإبط، والآمن منها، علشان تبقى عارفة الفروقات بينهم.. كمان عرفيها الفرق بين مزيل العرق ( deodorant ) اللي بيساعد في التخلص من الرائحة، وبين مضاد التعرق (antiperspirant) اللي بيساعد في تقليل العرق.. في حال المعاناة من رائحة غير مستحبة، فاستعمال مزيل العرق هو الحل.. أما في حال ان افرازات العرق كتيرة فقط، فمضاد العرق هو الحل..
وفيه منتجات طبيعية كتيرة يمكن استخدامها ودي الأفضل والأأمن ليهم لأنه استخدام المواد الكيماوية اللي بتأثر في العرق مش دايما بيبقى آمن..
٤. انزلوا مع بعض السوبرماركت أو المكان اللي هتشتروا منه منتحات النظافة، وخليها تشتري بنفسها علشان تستمتع بتجربة شرائية ممتعة معاكي وبالمرة يبقى الوقت الخاص بتاعكم سوا (special time)..
٥. فكريها دايما إن شنطة تمرينها يبقى فيها منتجات العناية بالنظافة..
٦. لو مكانتش بتعرف تشغل الغسالة قبل كده، ف ده الوقت المناسب لتعليم الغسيل علشان تنتظم وتبقى مسؤولة تماما عن غسيل هدومها، واشرحيلها احنا ليه بنغسل الهدوم.. مش بس علشان نشيل البقع، علشان هدومنا بتبقى عليها عرق وبكتيريا وده بيضر جلدنا لو لبسنا هدوم مش نظيفة حتى لو هي شكلها نظيف ومش عليها بقع، لكن طالما لبسناها كذا مرة، يبقى محتاجة تتغسل.. وعلميها إن أي هدوم ملاصقة للجسم بتتغسل بعد لبسة واحدة..
٧. علميها إنه مهم إن الأحذية خصوصا الرياضية محتاجين نحط فيها بيبي باودر أو كربونات الصوديوم علشان بتمتص الرائحة.. وفيه كور خشب من نوع معين بردو بتساعد في امتصاص الرائحة.. ممكن تدخلوا تدوروا سوا على المنتجات دي، علشان كمان يبقى عندها ثقافة كيفية البحث عن أي معلومة في الحياة وانها ممكن تعرفها بسهولة..
٨. نبهيها إلى استعمال المعجون مع فرشاة الأسنان علشان رائحة النَفَس تبقى دايما منعشة، وعلشان الناس متنفرش مننا واحنا بنتكلم معاهم.. وأهمية خيط الأسنان طبعا علشان الأكل بين الأسنان ممكن يعمل تسوس ورائحة برغم غسيل الأسنان المنتظم..
٩. طبعا محتاجة تتكلمي عن النظافة أيام البيريود وازاي تحافظ على نظافتها ونظافة هدومها طول الوقت.. وعلميها حديث الرسول صلى الله عليه وسلم عن سنن الفطرة..
١٠. بالنسبة للبنات، فالأب مينفعش يعلق أبدا على أي شيء يخص النظافة الشخصية أو يقولها كلام جارح.. الموضوع بيبقى صعب..
المواضيع دي الأم اللي تتكلم فيها.. الأب مش دوره إنه يسيء لبنته ولا يجرحها..

بناتنا بيبقوا محتاجين يعرفوا المعلومات بالتفصيل وبطريقة منطقية وعلمية.. فشجعيها على الأسئلة وانك دايما مستعدة للكلام عن أي حاجة حتى لو محرجة..

لو اتكلمتي مع بنتك بالخطوات دي وفكرتيها كل شوية بدون إنك تتسببي في إحراجها أو إهانتها، بنتك هتتعلم بسرعة جدا، والموضوع مش هيبقى مصدر أي خناقات بإذن الله..
اترك تعليقاً