بنتك مبتقعدش مع حد وقاعدة على موبايلها طول الوقت؟؟
بتلاقي بنتك بتتجنب مواقف أو أماكن او حتى محادثات معينة وبترفض إنها تعمل حاجات بالنسبالك عادية جدا
..
..أحيانا ده ممكن يبقى عادي لما تحس ان المكان اللي هي رايحاه ممل أو بيضغط عليها..
ولكن لما تلاقي السلوك ده متكرر محتاجين ننتبه له كويس
..
..
بتلاقيها بتخاف تتحط في أي ضغوطات تنافسية مع زملاءها، او بتقلق أحسن حد بيتنمر عليها أو يضايقها، علشان كده تلاقيها بتقولك مليون حجة إنها متروحش المدرسة أو التمارين..د. لورا شلسنجر قالت إن الأشخاص المحطمون يتجنبون التحديات وتعلم الأشياء الجديدة لخوفهم الشديد من الفشل..
مين اللي تقصدهم لورا بالكلام ده؟؟١. لو بنتك بتخاف من الفشل أو خايفة كمان من النجاح لقلة ثقتها في نفسها نتيجة الضغط اللي عليها، فبتخاف من الفشل بعد النجاح، فبتتجنب أي حاجة تؤدي ل ده
..
..٢. لو بنتك بتخاف جدا من النقد سواء منك أو من المدرسين لأنها انتقدت كتير جدا
..
..٣. لو لقيتي انها بتلعب تمارينها أو بتعمل أي نشاط وهي لوحدها بصورة أفضل بكتير من وهي قدام الناس
..
..٤. لو بتقارنيها بأي حد أفضل منها
..
..٥. لو بتمدحي حد تاني قدامها في صفة انتي بتعيبيها دايما عليها..
٦. لو بتقوليلها عيوبها في كتير من الأوقات
..
..النتيجة إن البنت بتبقى شايفة نفسها مليانة عيوب في شكلها، في جسمها، في صفاتها.. دايما شايفة نفسها أقل من اللي حواليها.. فبتتجنب تقعد مع عيلتها أو مع أي حد تاني، وبيبقى صعب عليها إنها تكوّن صداقات..وممكن كمان تدعي المرض علشان تهرب من مواقف معينة..
وعلى فكرة، بنتك مش قاصدة إنها تتجنب المواقف، ولكنها بتتجنب المشاعر والافكار اللي بتجيلها نتيجة المواقف دي..طيب تعملي إيه علشان بنتك ترجع تاني تندمج ومتبقاش حاسة بكل القلق ده؟؟١. خليها تشترك دايما في قرارات مهمة في البيت، وامدحي رأيها..
٢. اشركيها في اختيارات الرياضة والأنشطة اللي هي تحبها بعد تجربة رياضات وأنشطة كتير..
٣. أظهريلها الحاجات اللي هي مميزة فيها، ودايما اتكلمي عنها وعن إمكانياتها..
٤. تجنبي تماما المقارنات والتقليل منها سواء قدام حد أو لوحدكم.
٥. تجنبي النقد تماما، ولما تكوني عايزة توجههيها، قوليلها اللي انتي عايزاه منها مباشرة بدون لوم ولا عتاب ولا تجريح..
٦. إديها الأمان إنها تشاركك مشاعرها بدون الاستخفاف بيها..
أحيانا بناتنا بيتصرفوا تصرفات مبنفهمهاش، بس أكيد بيبقى ليها سبب.. والمطلوب مننا كأمهات إننا عينينا تبقى على المشاعر اللي ورا السلوك الظاهر..
اترك تعليقاً