حاسة إنك أم فاشلة؟؟
أكيد، كلنا بنخاف في وسط كل الفتن اللي مش عارفين لها أول من آخر
..
..أنا لما بفكر في طفولتي أو مراهقتي، مكانش فيه كم الفتن، ولا القنوات، ولا السوشال ميديا، ولا نتفلكس ولا القنوات المفتوحة طول النهار والليل دي
..
..وعلشان كده، بناتي وجيلهم كله بيصعبوا عليا من الفتن الشديدة دي، وبدعي ان ربنا يجنبهم الفتن والابتلاءات..
ف زي أي أم، انتي بتخافي انها تعرف ولد، وتدخّل نفسها في مشاكل هي وانتم في غنى عنها؟؟
..
..بتخافي إنها متذاكرش، ومتعرفش تدخل كلية كويسة
..
..بتخافي إنها تختار صحاب مش كويسين وتقلدهم
..
..بتخافي إنها متلتزمش بالصلاة وتكسل عنها..
..بتخافي لما تلبس هدوم مش مناسبة ومش هويتنا ولا دينّا
..
..علشان كده بتعملي كل حاجة تقدري عليها علشان تنقذيها.. بتدعميها، بتعلميها، ساعات بتهدديها أو تعاقبيها علشان تفوق وترجع للطريق الصح..
طيب، تعالي نشوف أصل المشكلة فين، علشان فعلا نقدر نحلها..
المشكلة إن أحيانا بنتك بتعمل السلوكيات اللي مبتعجبكيش زي انها متذاكرش، أو متصليش، أو تكلم ولد،… ومبتستجيبش وبتلاقي منها مقامة شديدة ورفض لأفكارك، زي ما تكون بتنتقم لنفسها.. ممكن مثلا بنتك تكون بتتعرض للنقد المستمر، أو تعليمات زيادة، انتي نفسك لو حد قالهالك هتزهقي علشان هي كتير.. أو ممكن تكون كل ما تقول رأي من وهي صغيرة، يتقالها انتي صغيرة على الكلام ده، متتحشريش في كلام الكبار.. فمش محسسينها إن رأيها كويس.. أو هي بتحس إنها فاشلة في المدرسة نتيجة إنه بيتطلب منها مجهود هي مش قادرة عليه.. أو ممكن جدا إن كل ده مبيحصلش، ولكن البيت مش فيه أي تغيير، ولا أي انشطة مختلفة.. هي بتحس إن عالم البيت مختلف تماما عن اللي بتشوفه بره.. فيه فجوة كبيرة بين البيت، وبين العالم بتاعها مع صحابها.. نقول مثلا من ناحية التكنولوجيا، بتشوف إنها بتتكلم مع صحابها عن السوشال ميديا، ومامتها وباباها لسه رافضين الفيسبوك والتيك توك وبينتقدوه طول الوقت، ومش بيتكلموا عن مميزاته.. فاللي بيحصل إنكم بتبقوا على طرفي نقيض.. هي مع صحابها في عالم، وانتي وباباها في عالم مختلف تماما.. كل ده بيحسس بنتك بالعجز، وإنها ملهاش أي تحكم ولا سيطرة على حياتها، بيحسسها إنها مقيدة، ومش عارفة تطلع شخصيتها على طبيعتها، أو بتحس إن شخصيتها غير مقبولة نتيجة لكل التصحيح اللي بيحصلها طول الوقت.. البنات (والولاد) لما بتتسحب منهم السيطرة وهما صغيرين، بيبقوا عايزين ينفسوا عن اللي هما حاسينه كبت من ناحيتهم، فبينفسوا الكبت ده في صورة تعمد رسوب في المواد، أو تعمد انهم يلبسوا لبس، هما عارفين كويس أوي إن أهاليهم مش هيبقوا راضيين عنه علشان بس يحسوا إن في إيدهم السيطرة.. أنا هنا مش هتكلم عن أد ايه التيك توك كارثي، لأن كلنا عارفين أد إيه هو فيه حاجات مش كويسة.. لكنه أصبح في حياتنا، وكل ما هترفضيه، كل ما بنتك هتتمسك بيه أكتر.. لكن ممكن نفكر في إن كل حاجة ليها عيوبها ومزاياها، وإننا نقول الحقيقة زي ما هي.. التيك توك مثلا مش كله وحش، فيه حاجات كويسة كتير، بس ده بناء على اختيار كل شخص.. لو كلمتيها بالمنطق وانك تقولي الحقائق، مش تقولي كلام غير منطقي هي مش بتصدقه، وكمان بتشوف إنك بعيد أوي عن العالم بتاعها.. لو اتكلمتي عن حقائق واتكلمتي بالمنطق، هي هتستجيب تدريجيا.. ومقاومتها لكلامك هتقل.. كمان محتاجين إننا نديهم الثقة.. نحسسهم إنهم أشخاص كويسين.. نحسيهم إن رأيهم كويس وناخد بيه.. ندور على الحاجات الحلوة اللي بيعملوها، ونبرزها ليهم علشان احنا مرايتهم اللي بيشوفوا كل حاجة من خلالنا.. محتاجين نديهم مساحتهم ونسمعلهم من غير تريقة ولا تهزيء، لو سمعناهم كويس، هيحبوا قعدتنا وكلامنا معاهم.. كلنا بنحب اللي يدينا اهتمام.. كل ما سمعناهم، كل ما فهمناهم وقدرنا نتصرف معاهم بطريقة مظبوطة..
الجيل ده مثقف ومنفتح جدا.. علشان كده محتاجين كلامنا يبقى على نفس مستوى ثقافتهم علشان نوصل لفكرهم ونقنعهم يشفوا الصح صح، والغلط غلط، متبقاش مقاومة من باب إثبات الذات والسيطرة..
اترك تعليقاً