بنتك مبتكلمكيش إلا لما تكون عايزة منك حاجة؟
أم بتشتكيلي إنها كبرت ومحدش حاسس بيها.. بنتها بتطالبها إنها تلبيلها كل طلباتها ومش مهم إذا كانت تعبانة.. ومبتكلمهاش غير لما تكون عايزة تطلب منها طلب 
..
..أم تانية بتروح للدكتور لوحدها لما بتكون تعبانة.. ومحدش من ولادها ضميره بيأنبه حتى
..
..الأمومة مش معناها إننا نتخلى عن بشريتنا وإنسانيتنا واحتياجاتنا
..
..التضحية مش معناها إننا نسحق نفسنا لغاية ما نصحى يوم فاقدين لهويتنا وحقوقنا
..
..
متستنيش لما ولادك يكبروا علشان تعلميهم بإنك ليكي حق زيهم.. حق في الراحة، وإن محدش يخبط عليكي لما تدخلي أوضتك علشان تبعدي شوية عن الدوشة.. حق في إنك تطلبي أكل من بره وإنتي قاعدة لوحدك علشان تستمتعي وتحسي إنك عايشة.. متستنيش لما ولادك يكبروا وتطلبي حقك، علشان للاسف ساعتها بيكون الوقت فات وبنتضطري تكملي تضحيه علي حساب نفسك، وتلاقي اجمل سنين عمرك عدوا بسرعة.. وتصحي تلاقي نفسك كبرتي وفوقتي على صحتك اللي نسيتيها، وشعرك اللي مبقيتيش تعتني بيه.. وبشرتك اللي بان عليها السن قبل الأوان.. نضحي مفيش مشكلة، أكيد احنا بنستمتع واحنا بنيجي على نفسنا “أحيانا” وبناتنا وولادنا مبسوطين، ولكن التضحية اللي هتخلي حقنا مهضوم، وبناتنا يتعاملوا معانا بعد كده على اننا ملناش حقوق أصلا، يبقى احنا اتصرفنا بطريقة غلط أكيد
.. احنا بشر ومينفعش نفكر في نفسنا كمواطنين درجة تانية علشان هنخلي اللي حوالينا يعاملونا على هذا الأساس
.. خلينا نضحي ونيجي على نفسنا بطريقة معقولة ومنطقية، وفي نفس الوقت حطي نفسك في مكانتك الصح وسط عيلتك، علشان متضطريش تستنى تمن التضحيات دي في يوم من الأيام.. محتاجين نحتفظ بمكانتنا ونربي ولادنا على الاحساس بينا.. وده بيبتدي إننا نحس بيهم ونتعاطف معاهم علشان يحسوا بينا ويتعاطفوا معانا لما نحتاج ده
..
شاركيني إيه اللي هتعملي علشان توازني بين إنك تيجي على نفسك علشان راحة ولادك، وبين احتياجاتك؟؟..
اترك تعليقاً