ماما، أنا شكلي مش عاجبني.. كان نفسي أبقى بيضا زيك
بنتك جتلك وقالتلك أنا مش حلوة؟؟.. أو قالتلك أنا كان نفسي أبقى شبهك علشان كل الناس بتقولك انك انتي حلوة؟؟
حصلت وبتحصل طول الوقت خصوصا في بدايات المراهقة.
طبعا من أسوأ الحاجات اللي ممكن تحصل للبنت، انه يتم التعليق على شكلها أو يتقارن بينها وبين مامتها أو أخواتها
..
..وللأسف القرايب بيعملوا ده و بيدمروا ثقة البنات بنفسها من بدري وهما مش دريانين
..
..طبعا أول رد فعل منك بيكون، “لأ طبعا يا حبيبتي انتي جميلة جدا، ازاي انتي مش شايفة ده؟؟”..
وردها بيكون ايه؟ يا بتسكت وهي محبطة ومش مقتنعة باللي انتي بتقوليه، يا إما بتصر وتقولك لأ طبعا أنا مش حلوة
..
..فانتي محتاجة تشتغلي على النقطة دي بطريقة مختلفة علشان بنتك تقدر تحسن صورتها عن نفسها فعلا..
بس ازاي؟؟..
لما تقولك انا مش جميلة أو محدش بيحبني، متقوليلهاش بالعكس انتي جميلة لأن ده مش هيفيد خالص.. انتي مامتها وهي عارفة انك عايزة تراضيها وتخففي عنها، فكلامك في الوقت ده مش هيبقى ليه أي تأثير..فأول حاجة تقوليهالها هي:
“انتي فعلا حاسة بكده؟ حاسة انك مش جميلة؟”..– هتقولك أيوة أو هتسكت..
قوليلها “ليه حاسة بكده؟”..– هتقولك مثلا علشان انا مش بيضا زيك، أو الناس قالولي اني مش حلوة زيك..
أنا عايزاكي تسيبيها تتكلم براحتها تماما ومن غير تعليق منك، لكن شجعيها انها تتكلم بإنك تبقي مركزة معاها ومع كلامها وتعابير وشك تكون حنينة..متستعجليش انك تحاولي تثبتي ان وجهة نظرها عن نفسها غلط.. ده هيفرق جدا معاها في إنها تنفتح وتطمن وتتكلم أكتر.. فإنتي هتفهمي اللي داير في دماغها أكتر..
قوليلها “تفتكري ان رأي الناس دايما صح؟؟.. فاكرة لما قريبتنا قالت رأيها في الموضوع الفلاني وطلع رأيها غلط؟ مش معنى كده انها مش كويسة أو بتفكر غلط، ولكن احنا كلنا بشر..أنا كمان بشر.. رأيي مش دايما صح، بس أنا بجتهد، وأحيانا رأيي صح وأحيانا غلط.. ده عادي..
ولكن مش العادي ان حد يقول لحد رأيه في شكله.. الشكل ده احنا اتخلقنا بيه.. وكلنا حلوين بأشكال مختلفة.. واللي يتكلم عن الشكل محتاج انه يتعلم ازاي يتكلم مع الناس..فيه حد أبيض وبياضه مخليه حلو.. وفيه حد أسمر وسماره جميل ولذيذ.. وفيه حد عينيه واسعة وجميلة.. وفيه حد خدوده مليانه وعسول..
كل حد فينا فيه ميزة في شكله
..
..وكمان ممكن تلاقي واحدة حلوة أوي بس شخصيتها ممكن تبعد الناس عنها، وواحدة أقل منها في الجمال لكن الناس بتحبها جدا..
يبقى الشخصية كمان بتخلي الناس تشوف الشكل بطريقة مختلفة..إذن الحكم على جمال الشكل ملوش لزمة لأنه مش أساس ان حد هيبقى ناجح أو ليه صحاب ولا لأ..
الأساس هي الشخصية.. الشخصية ممكن تخلي حد يبان أوحش أو يبان أجمل..
ودي نعمة كبيرة من ربنا، علشان احنا نقدر نشتغل على شخصيتنا، دي حاجة في ايدينا.. نقدر نحسن من نفسنا طول الوقت وده اللي هيخلينا مبسوطين بنفسنا وناجحين.. شخصيتنا اللي بنطور فيها طول الوقت..
——-
ده الكلام اللي انتي محتاجة تقوليهولها وبالراحة جدا بعد ما تسمعي منها كل اللي هي عايزة تقوله وكل مشاعرها اللي شايلاها جواها..
ومتغفليش أبدا أبدا إنك تمدحي في شكلها وشياكتها وأناقتها بمناسبة ومن غير مناسبة..
انتي أكبر معجبيها، امدحي شكلها في كل الأوقات وكل المناسبات.. ده مهم جدا علشان ثقتها في نفسها تزيد أكتر وأكتر..
لكن لما تجيلك تقولك انا مش حلوة، يبقى تديري الحوار بشكل مختلف تماما علشان تقدري تغيري ازاي هي بتشوف نفسها، وتبتدي تتقبل نفسها وتشوف نفسها حلوة.. وكمان تشتغل على الأهم وهو شخصيتها..
تغيير نظرة بناتنا لنفسهم، عمره ما هيتعمل بإنك تقوليلها لأ بالعكس انتي حلوة.. إنما محتاج ادارة حوار بطريقة صحيحة..
********
وعلشان يبقى معاكي دليل يساعدك في تربية بنت واثقة من نفسها، يمكنك طلب كتابي “كيف تربين فتاة واثقة من نفسها” في جميع محافظات مصر، ابعتيلي رسالة على الصفحة..
اترك تعليقاً