٥ أسئلة ذهبية هتخلي بنتك ناجحة جدا بإذن الله
الطفل بين سنة و٤ سنين مبيفكرش في الفشل، مبيفكرش إذا هو ممكن يفشل أو لأ أصلا.. علشان كده بيحاول يقف ويمشي مهما وقع واتخبط واتعور، لا يتوقف عن المحاولة أبدا
.. ده اللي قاله مارك مانسون في كتابه فن اللامبالاة..
.. ده اللي قاله مارك مانسون في كتابه فن اللامبالاة..طيب ايه اللي بيحصل بعد كده بيخلي بنتك أو ابنك يبقوا مبيحاولوش يحسنوا من مذاكرتهم أو حتى يحسنوا من علاقاتهم؟؟.. إيه اللي بيخلينا احنا ككبار نبقى خايفين واحنا بنربي بناتنا وولادنا؟؟
..
..المبدأ اللي اتزرع فينا واحنا صغيرين.. اوعي تجيبي درجة وحشة.. صحابك أشطر منك.. شوفي أختك جابت ميدالية في البطولة وانتي لأ.. اللوم والعقاب اللي دايما موجودين بعد أي فشل حتى لو صغير
..
..علشان كده انتي ممكن تكوني موهوبة جدا في حاجة بس خايفة من الفشل فمبتبدئيش
..
..وعلشان كده بنتك مبتقدرش تطلّع مواهبها ولا الحاجات اللي هي شاطرة فيها، وكتير من الأمهات يقولي أنا بنتي مش باينلها موهبة ولا هواية ولا هي مهتمة بحاجة خالص
..
..الخوف من الفشل هو القالب اللي اتحطينا فيه واحنا صغيرين، واحنا بنكرر نفس الخطأ مع بناتنا
..
..
علشان كده مش عايزين نخوف بناتنا من الفشل.. لكن نسألهم ٥ أسئلة:١. احساسك ايه لما منجحتيش؟؟..
٢. تعالي نقعد مع بعض ونشوف إيه اللي حصل؟.. من وجهة نظرك ليه منجحتيش؟؟..
٣. فاكرة لما نجحتي في كذا وكذا؟؟.. فاكرة الحاجات اللي نجحتي فيها قبل كده؟؟.. عديهم..
٤. ازاي تقدري تحسني الموضوع المرة اللي جاية؟؟.. تعالي نفكر مع بعض..
٥. أقدر أساعدك ازاي؟؟..
الأسئلة دي مفيهاش أي لوم ولا نقد.. دي فيها مساعدة إن مخ بنتك يبقى مفتوح علشان تقدر تفكر صح.. مش خايفة من انتقادك ليها.. مش بتشك يا ترى انتي بتحبيها ولا لأ؟؟.. مركزة في إنها تقوم بعد ما تقع..وهو ده اللي هيخلي بنتك عندها تحفيز داخلي وحماس إنها تحاول وتجرب مرات كتيرة.. علشان الخوف مش قافل مخها.. سؤالك ليها هيخليها مركزة على كيفية تصحيح خطأها أو فشلها..
اترك تعليقاً