خطوتين بس لو عملتيهم، بنتك هتبقى شخصية مستقلة
==================
بنتي بتيجي تسألني على كل حاجة.. ألبس إيه؟؟.. أطلب إيه من المطعم؟؟.. أشتري أنهي شنطة؟؟.. أذاكر إيه الأول؟؟.. مبتقررش حاجة لوحدها.. حتى في أبسط الحاجات..
وطبعا إحساسك ساعتها بيبقى سيء جدا.. هي البنت دي هتبقى شخصيتها ضعيفة؟؟.. هي مش هتطلع مستقلة وتعرف تدافع عن نفسها؟؟.. وأسئلة مظلمة كتير بقى
..
لو بنتك مبتعرفش تقرر لوحدها أو ساعات تقرر قرارات تبقى غلط تماما وانتي تستغربي إزاي حد عاقل يفكر بالطريقة دي؟؟ يبقى انتي محتاجة تقرئي البوست ده..
بنتك ممكن كانت معتمدة عليكي وهي صغيرة، انتي اللي كنتي بتأكلي وتشربي وتغيري..
والمفروض إن ربنا بيأهل الأطفال شوية بشوية إنهم يبقوا مستقلين.. ولكن للأسف بتيجي تدخلاتنا وتضعف مهاراتهم علشان احنا خايفين عليهم أوي
..

علشان ناخد بالنا، التدخلات اللي انتي بتعمليها وانتي مش واخدة بالك إنها بتخلي بنتك تابع، سواء ليكي أو لأصحابها، هي عيارة عن:
1- إن بنتك دايما مستنية رضاكي عن كل حاجة هي بتعملها علشان تعرف تكمل.. يعني معندهاش الدافع إنها تكمل حاجة غير لما تقوليلها إنها كويسة.. بتدور دايما على رضاكي انتي بالذات عن اللي بتعمله حتى لو في الحاجات العادية جدا.. والمشكلة إن الناس بتفهم إن البنت كده مثالية ومطيعة ومعطاءة، بتعطي الآخرين بدون حدود وبتتجاهل احتياجاتها هي.. ودي بنسميها people pleaser..

ودي من الحاجات المهمة اللي اتكلمت عنها في الفصل الثالث من كتابي “كيف تربين فتاة واثقة من نفسها”
2- انتي اللي بتقوليلها تحس بإيه أو متحسش بإيه، يعني كتير بتبقى متضايقة من حاجة، وتقوليلها إن الموضوع ميستاهلش.. أو إن الموضوع بالنسبالها بسيط.. أو تقوليلها هي ازاي صاحبتك تقولك كده وانتي تسكتيلها.. فهي ماشية على إحساسك انتي، وبالتالي مش بتصدق إحساسها ولا أفكارها..
3- ممكن تكوني بتدي هدايا على الإنجازات فقط.. يعني لو نجحت مثلا، بتجيبيلها هدية، لو مفيش إنجاز مفيش هدايا، مع إن الهدايا بتعبر عن الحب، يعني المفروض إن ملهاش معاد ولا مرتبطة بحاجة معينة بنتك لازم تعملها..
4- انتي اللي بتقرري بالنيابة عنها، تروح أي مدرسة وتشترك في أي نشاط وتقعد مع مين ومتقعدش مع مين علشان انتي دايما بتقوليلها أنا عندي خبرة وانتي لسه مش فاهمة حاجة في الحياة، فاسمعي كلامي.. ف لو بنتك شخصية قوية، هتعمل عكس اللي انتي عايزاه بالضبط علشان تحسس نفسها إنها تقدر تكسر القيود وإنها مستقلة ولكن للأسف الشديد لبسها بيبقى سيء ومخيب للآمال، درجاتها بتبقى ضعيفة، واختياراتها سيئة في أصدقاءها.. ودي بنسميها reactor..
والنتيجة بتبقى إن يا إما بنتك:
أ. بترضي الآخرين على حساب نفسها..
ب. مبتبذلش جهد كفاية مع إنها تقدر تحقق حاجات كتير، زي إنها تجيب درجات متوسطة وهي تقدر تقفّل الامتحان أو تجيب درجة عالية جدا..
ت. بتخالف رأيك طول الوقت لمجرد إنها عايزة تثبت إنها موجودة وعايشة وليها كيان..
ث. منغلقة على نفسها لأنها معندهاش القدرة حتى إنها تخالفك الرأي..
ج. عصبية وردود أفعالها غير مناسبة للفعل أبدا..

وعلشان بنتك تبقى فعلا مستقلة، وشخصية متوازنة، انتي محتاجة تعملي حاجتين مهمين جدا:
1- اديها الأمان إنك دايما موجودة علشان تدعميها وإنها لما تغلط تجيلك علشان تقدروا تتصرفوا سوا علشان هي لسه بتتعلم..
عارفة لما بنتك بتكون لسه خايفة وهي بتتعلم ركوب العجلة؟؟، انتي في وقت لازم تديها زقة علشان تبعد عنك وتعرف إنها ممكن تسوق لوحدها، وحتى لو معرفتش ووقعت، انتي في ضهرها موجودة علشان تطبطبي عليها وتخففي ألمها..
هي دي الحاجة اللي بنتك محتاجاها منك دلوقتي، إنها تثق إنها في أمان، مش هتنتقديها ولا تلوميها، إنما هتعلميها وتوجهيها، وتعرفي إنها لسه بتتعلم وهتغلط، ومفيش مشكلة إنها تغلط..
ودي أكتر حاجة هي محتاجاها علشان تثق في نفسها
2- انتي وبنتك محتاجين تشوفوا قدراتها على مواجهة الحياة، لو لسه معندهاش القدرة دي، انتي محتاجة تشوفي ايه اللي ناقصها علشان تدربيه عليها..
لو اللي ناقصها انها تشوف نفسها حلوة وعلشان كده بتحب تصاحب الولاد، يبقى انتي وباباها محتاجين تكملوا ده..
لو اللي ناقصها إنها تشوف نفسها مميزة علشان متمشيش ورا صحابها عمياني، يبقى هي محتاجة تتحط في أنشطة مختلفة بعيد عنك علشان تشوف في نفسها القدرة دي.. ابعدي عن النشاطات والرياضات العادية، اشتركيلها في حاجات مختلفة عن صحابها وعن اللي حواليكم بيعملوها..
لو اللي ناقصها إنها تفهم إننا عايشين في فتنة وإننا مش لازم نقلد اللبس الغريب، يبقى هي محتاجة تروح لحد متفتح يفهمها دينها ويصحح لها المفاهيم بتاعتها عن ليه احنا موجودين في الحياة..
وعلشان تعرفي اللي ناقصها، انتي محتاجة تديها الأمان علشان دايما تبقى منفتحة قدامك..
شاركيني ايه اللي ناقص بنتك من وجهة نظرك..
اترك تعليقاً