“يا بنتي اوعي تزعلي. مفيش حاجة تستاهل” … جملة سهلة وفي ثقافتنا لكن للأسف نتائجها سيئة..
واحدة أعرفها قطتها ماتت، فاتصلت بيها علشان أخفف عنها وبالطبيعة كده قلتلها “متزعليش”…
وسكت ثانيتين وبعدين أدركت إن الكلمة طلعت مني عفويا.. ولحقت نفسي بسرعة وقلتلها “لأ، ازعلي.. ازعلي أوي على قد الحزن اللي انتي حاسة بيه”…
أيوة، لازم المشاعر اللي بتمر بينا، نحس بيها أوي… نستشعرها وبعدين لما نخلصها نعديها let it go …
لما نفرح، نستشعر الفرح.. لما نزعل، نستشعر الحزن.. لما نحس بأي مشاعر، نستشعرها، نتذوقها، نحس بيها أوي…
متلهيش نفسك عن مشاعرك… متلهيش ولادك عن مشاعرهم، متخافيش… أحاسيس الحزن والفقد والضيق مهم جدا اننا نحسها في وقتها، لأننا لو لهينا نفسنا أو ولادنا عن المشاعر دي، هتفضل جوانا منغصة علينا حياتنا وهتيجي مشاعر تانية فوقها وهنحس اننا فينا حاجة غلط بس مش فاهمينها، فيه حاجة كاتمة على نَفَسنا بس مش عارفين نعبر عنها..
كل المشاعر دي بتخلي عندنا توتر وبالوقت بيبقى توتر مزمن، كورتيزول كتير في الجسم، لغاية ما ييجي الوقت وننفجر في أقرب الناس لينا… أو نمرض من كتر المشاعر اللي كتمناها جوانا…
الإلهاء أو التشتيت عن الإحساس بالمشاعر حل مريح في وقتها لكنه مؤقت جدا… من أسوأ الحاجات اللي ممكن تعمليها مع ولادك انك تشتتيهم عن حزنهم أو غضبهم لأنك يا إما مش عايزة تشوفيهم زعلانين أو لأنك واخدة زعلهم بشكل شخصي لأنه معناه انك مقصرة معاهم ولما يوصلوا لسن المراهقة بنبقى مستغربين هما ليه غضبانين طول الوقت وبعيد عننا أوي كده….
عايزة تحسي بمشاعرك؟؟؟
اسألي نفسك الأسئلة دي:
١. “أنا حاسة بإيه بالضبط؟” حزن.. ضيق.. وحدة.. بؤس… إيه بالضبط؟
٢. “يا ترى إيه مصدر الإحساس ده؟ إيه سببه؟” حد قالي حاجة ضايقتني.. موقف معين حصل.. حد بصلي بصة مريحتنيش… إيه بالضبط؟
٣. “امتى أول مرة حسيت بالشعور ده؟” النهاردة.. من ٣ سنين.. وأنا طفلة عندي ٦ سنين.. امتى؟
٤. “إيه تأثير الإحساس ده عليا؟”… مزعلني ومضايقني.. مش مخليني مرتاحة.. منكّد عليا حياتي.. إيه؟
كل ده هجاوبه، هطلعه بره مخي سواء بالكتابة أو بإني أقوله لحد تاني بثق فيه…
لازم نقف ونفكر ونتفكر، نتأمل، نفهم نفسنا أكتر.. نساعد نفسنا ونساعد ولادنا…
خلاص حسينا؟ عشنا في الشعور؟ تمام…
فيه وقت لازم أقول لنفسي let it go علشان مغرقش في مشاعري.. أو بمعنى أصح مخليش مشاعري تغرقني وتسيطر على أفكاري وتصرفاتي وأعيش في كآبة وحزن..
اللي يساعدني في اني أ let it go ؟؟؟
١. إني فعلا استشعرت الأحاسيس والمشاعر اللي حسيتها..
٢. القرار.. إني أقرر فعلا إني في اللحظة دي هسيب المشاعر تعدي..
٢. الاستغفار وحسن الظن بالله..
٣. الالتجاء لله والتعلق به.. لا ملجأ ولا منجى إلا إليه..
٤. الدعاء.. الدعاء.. الدعاء قبل وبعد كل شيء..
٥. إننا نبقى في صحبة… الصحبة اللي ممكن نتكلم معاهم من غير ما يحكموا علينا.. اللي بيسندونا وقت ضعفنا…
مش معنى كده إننا هننسى الموقف اللي ضايقنا.. لكن إحساسنا ناخيته هيبقى مختلف.. مش هيبقى مزعلنا زي الأول.. مش هنبقى حاسين إنه خانقنا.. مش هنبقى حاسين إن فيه حاجة تقيلة شايلينها ومش عارفين إيه هي..
Feel it.. then let it go…
اترك تعليقاً